საქართველოს შინაგან საქმეთა სამინისტრომ უცხო ქვეყნის მოქალაქეების მხრიდან სავარაუდო გარყვნილი ქმედების საქმეზე გამოძიება დაიწყო.

დღეს ტელეკომპანია იმედმა მეზობლებზე დაყრდნობით გაავრცელა ინფორმაცია. მათი თქმით, რამდენიმე პირმა არასრულწლოვნები საკუთარ ბინაში აიყვანა, გააშიშვლა და ფოტოებიც გადაუღო. მას შემდეგ, რაც ხმაური ატყდა, უცხოეთის მოქალაქეებმა პოლიციას თავად გამოუძახეს.

როგორც შსს-ში On.ge-ს უთხრეს, გამოძიება სისხლის სამართლის კოდექსის 141-ე მუხლით მიმდინარეობს, რაც გულისხმობს გარყვნილ ქმედებას ძალადობის გარეშე, დამნაშავისათვის წინასწარი შეცნობით თექვსმეტი წლის ასაკს მიუღწეველთან. დამტკიცების შემთხვევაში, დანაშაული ისჯება ხუთიდან შვიდ წლამდე პატიმრობით.

საქართველოს კანონმდებლობით, გამოძიების დასაწყებად მოქალაქის განცხადებაც საკმარისია. On.ge დააკვირდება გამოძიების მიმდინარეობას და მის შედეგებს საზოგადოებას დაუყონებლივ აცნობებს.