ლუის რუბიალესი, ესპანეთის ფეხბურთის ფედერაციის პრეზიდენტი, პოსტის დატოვებაზე უარს ამბობს. სამსახურიდან მისი წასვლის საკითხი მას შემდეგ დადგა, რაც ქალების მსოფლიო ჩემპიონატის ფინალზე, ესპანეთის ქალთა ნაკრების გამარჯვების შემდეგ მან ფეხბურთელ ჯენიფერ ერმოსოს მისი ნების საწინააღმდეგოდ აკოცა. ამ საქმეს FIFA-ს დისციპლინური კომიტეტი განიხილავს.

რუბიალესის თქმით, "სოციალურ მკვლელობას აქვს ადგილი". ის გადადგომაზე კატეგორიულ უარს აცხადებს და ამბობს, რომ თავის ინტერესებს დაიცავს.

ესპანეთის სამეფო ფეხბურთის ფედერაციამ შეხვედრაც გამართა, რათა რუბიალესის მომავალი და მისი პოტენციური შემცვლელის ვინაობა განეხილათ. ფედერაციის პრეზიდენტმა ინტერნეტში გავრცელებული ვიდეოს საშუალებით ბოდიში მოიხადა, თუმცა გულშემატკივართა ნაწილმა და ასევე, ესპანეთის პრემიერმინისტრმა, პედრო სანჩესმა, ეს არასაკმარისად ჩათვალა.

ფეხბურთელ ჯენიფერ ერმესოს ინტერესებს მსოფლიო მოთამაშეთა კავშირი წარმოადგენს. ერმესომ ფიფას მსგავსი ქცევის დაგმობისკენ მოუწოდა და თქვა, რომ ეს "ქალის ღირსებას ლახავს". მოთამაშეთა კავშირმა ესპანეთის ფეხბურთის ასოციაციას შესაბამისი ზომების მიღებისკენ მოუწოდა.

ასევე, რუბიალესმა მატჩის დღეს გამარჯვების შემდეგ ესპანეთის დედოფლისა და მისი 16 წლის შვილის თანდასწრებით უხამსი ჟესტი აჩვენა, რის გამოც მოგვიანებით ბოდიში მოიხადა.