საფრანგეთში საპროტესტო ტალღა 4 დღის წინ დაიწყო, მას შემდეგ, რაც წარმოშობით ალჟირელი 17 წლის მოზარდი პარიზის გარეუბანში პოლიციელმა მოკლა.

• თვითმხილველის მიერ გადაღებულ კადრებში ჩანს ორი ოფიცერი, რომლებიც მანქანასთან დგანან, ერთ-ერთი კი საფრთხის არარსებობის მიუხედავად, იარაღს მძღოლის მიმართულებით ისვრის.
• ოფიცერი მოგვიანებით ამბობდა, რომ იარაღი გაისროლა, რადგან ეშინოდა, რომ ბიჭი ვინმეს მანქანით დაარტყამდა — ის ახლა წინასწარ პატიმრობაში იმყოფება.
• მთავრობამ მთელი ქვეყნის მასშტაბით 45 000 სამართალდამცავი გამოიყვანა.
• მაკრონმა მშობლებს მიმართა, შვილები სახლებში დაეტოვებინათ, თუმცა ახალგაზრდებსა და პოლიციელებს შორის საფრანგეთის ქუჩებში შეტაკებები მძვინვარებდა.
• კადრებში ჩანს ცეცხლმოკიდებული მანქანები და შენობები დამსხვრეული ფანჯრებით — მთავრობამ პროტესტის ჩასახშობად სპეცრაზმიც გამოიყვანა.
• მაკრონმა არეულობის დაწყების შემდეგ მინისტრებთან საგანგებო შეხვედრა გამართა.

მომიტინგეები მიიჩნევენ, რომ მოზარდის მკვლელობა რასიზმის ნიადაგზე მოხდა, რადგან საფრანგეთში უმცირესობების მიმართ პოლიციის მხრიდან დისკრიმინაციას ხშირად აქვს ადგილი.

• 2017 წელს საფრანგეთის უფლებადამცველი ორგანიზაციის მიერ ჩატარებულმა კვლევა აჩვენა, რომ თეთრკანიან ახალგაზრდებს 20-ჯერ ნაკლები სიხშირით აჩერებს პოლიცია, ვიდრე სხვა მათ თანატოლებს.
• გარდა ამისა, პოლიციის მიერ ძალის გადამეტება არის კიდევ ერთი პრობლემა, რომელიც ქვეყანაში დგას.
• ევროპის საბჭომ წლის დასაწყისში საფრანგეთში საპენსიო რეფორმასთან დაკავშირებული პროტესტის დროს სამართალდამცავები სწორედ ამის გამო გააკრიტიკა.
• უფლებადამცველი ჯგუფები, როგორიც არის Amnesty International, საფრანგეთის პოლიციას ურჩევს, სისტემური რეფორმა გაატაროს დისკრიმინაციის აღმოსაფხვრელად.
• ასევე, გაერომ მოუწოდა საფრანგეთს, გადაჭრას რასიზმისა და დისკრიმინაციის პროლემები სამართალდამცავ ორგანოებში.

გაეროს ადამიანის უფლებათა უმაღლესი კომისრის წარმომადგენელმა საფრანგეთის ხელისუფლებას მოუწოდა, პატივი სცეს კანონიერებას, და პროპორციული ძალის გამოყენების პრინციპს.

• ამას მოჰყვა საფრანგეთის საგარეო საქმეთა სამინისტროს კომენტარი, სადაც ნათქვამი იყო, რომ ქვეყანა და მისი პოლიცია იბრძვის რასიზმისა და დისკრიმინაციის ყველა ფორმის წინააღმდეგ.
• ასევე, მათი მტკიცებით, პოლიციისა და ჟანდარმერიის მიერ ძალის გამოყენება მკაცრად კონტროლდება და პროპორციულია.

დეტალები: მოზარდის მკვლელობის შემდეგ ქუჩებში ათასობით მომიტინგე ლოზუნგებით "პოლიცია კლავს" გამოვიდნენ.

• 28 ივნისის შემდეგ პოლიციამ 2 000 ადამიანი დააკავა, აქციის 500-ზე მეტი მონაწილე კი დაშავდა — ამ ციფრებს CNN საფნარგეთის შსს-ზე დაყრდნობით ავრცელებს.
• მხოლოდ პარიზში უსაფრთხოების 5 000 თანამშრომელი იყო გამოსული.
• შს მინისტრის თქმით, ოფიცრებს მიეცათ უფლებამოსილება, ჩაეხშოთ არეულობები და საჭიროების შემთხვევაში, "წესრიგის აღდგენის მიზნით" დაეპატიმრებინათ ისინი.
• პროტესტი მიმდინარეობდა საფრანგეთის საზღვრისპირა ტერიტორიებზეც.
• Associates Press საფრანგეთის შინაგან საქმეთა სამინისტროზე დაყრდნობით იუწყება, რომ პროტესტის მეოთხე ღამეს, პოლიციასთან შეტაკებებისას 1 300-ზე მეტი ადამიანია დაკავებული.

• ტრანსპორტი საფრანგეთში შეფერხებით მოძრაობს.

• შსს-ს ცნობით, საზოგადოებრივი ტრანსპორტი, მათ შორის, ავტობუსები და ტრამვაი მთელი ქვეყნის მასშტაბით მხოლოდ საღამოს 9 საათამდე იმოძრაოვებს.

მაკრონმა გააუქმა მისი ვიზიტი ბრიუსელში, ევროსაბჭოს სამიტზე, რომელიც პარასკევის ჩათვლით უნდა გაგრძელებულიყო.

• ასევე, აკრძალა ყველა მასშტაბური ღონისძიება და ხალხმრავალი შეკრებები და კიდევ ერთხელ მოუწოდა მშობლებს, შვილები სახლებში დაეტოვებინათ, რადგან "დაკავებულებს შორის ბევრი ახალგაზრდა იყო".
• ასევე, მოუწოდა ონლაინპლატფორმებს, როგორიცაა Tik-Tok და Snapchat, მოახდინონ იმ მომხმარებლების იდენტიფიცირება, რომლებიც სოციალურ ქსელებს ძალადობის წასახალისებლად იყენებენ.