საპასუხო განცხადება ინსტიტუტმა (EWMI-მ) დღეს გაავრცელა.

რატომ არის მნიშვნელოვანი: ანტიდასავლური მოძრაობა, რომელიც ქართული ოცნების ყოფილი დეპუტატებითაა დაკომპლექტებული, მუდმივად თავს ესხმის დასავლურ ინსტიტუტებსა და ღირებულებებს.

  • ამჯერად, 23 იანვარს გამოქვეყნებულ მორიგ განცხადებაში, მათი ბრალდებები USAID-ის მიერ დაფინანსებულ პროგრამას შეეხო.
  • ანტიდასავლური მოძრაობის მტკიცებით, პროგრამის მიზანია, შეაღწიოს სასამართლო სისტემაში და იქ აშშ-ის საელჩოსა და ნაცმოძრაობის პოლიტიკური გავლენა აღადგინოს.

დეტალები: აღმოსავლეთ-დასავლეთის მართვის ინსტიტუტის განცხადებით, მათი საქმიანობა ყოველთვის პოლიტიკურად ნეიტრალური იყო და კანონის უზენაესობის გაძლიერების პროექტებით შემოიფარგლებოდა.

  • მათივე თქმით, დიდი სამუშაო გასწიეს, რათა არასდროს ყოფილიყვნენ დაკავშირებული რომელიმე პოლიტიკურ პარტიასთან.
  • "იურიდიული განათლების გაუმჯობესების მხარდაჭერით, EWMI დაეხმარა იურისტ პროფესიონალთა ახალ თაობას, ფლობდეს პრაქტიკულ უნარებს და გააცნობიერონ, როგორ შეიძლება კანონი იყოს ადამიანის უფლებების დაცვის მექანიზმი. EWMI, ასევე, დაეხმარა საქართველოში უფასო იურიდიული დახმარების გაფართოებასა და ხარისხის გაუმჯობესებას, მუშაობდა დაუცველთა, განსაკუთრებით, ქალების, ბავშვებისა და სხვა მოწყვლადი ჯგუფების უფლებების დაცვაზე", — ნათქვამია განცხადებაში.
  • ინსტიტუტი ხაზს უსვამს, რომ მომავალშიც გააგრძელებს არაპარტიული ხასიათის საქმიანობის საქართველოში კანონის უზენაესობის გასაძლიერებლად.