ყვარლის ევროკლუბის განცხადებით, მზად არიან გამოძიებას მიაწოდონ სრული ინფორმაცია მომხდარზე და ასევე გადასცენ გარე პერიმეტრზე დამონტაჟებული კამერებიდან ამოღებული ჩანაწერები.

რატომ არის მნიშვნელოვანი: გუშინ, 15 იანვარს ყვარელში საჯარო ლექციის ჩასატარებლად ჩასულ ლევან ბერძენიშვილს ძალადობრივმა ჯგუფებმა არ მისცეს ევრო-ატლანტიკური ცენტრის შენობაში შესვლის და ლექციის ჩატარების საშუალება.

  • შეკრებილები ამბობდნენ, რომ "ერეკლე მეფის მოღალატედ შერაცხავს" კახეთში არ ელოდნენ. როგორც ბერძენიშვილი ფორმულასთან ამბობს, ალტ-ინფოს ჟურნალისტმა მას უთხრა, რომ ეს პირები პრორუსული, ძალადობრივი და ჰომოფობიური დაჯგუფების, ალტ-ინფოს წევრები იყვნენ.

გამოხმაურებები: DRI-ს შეფასებით, მოძალადე ჯგუფების თავდასხმები ხელისუფლების წახალისებულია.

  • დროას ლიდერი ელენე ხოშტარიას განცხადებით, "ტყუილია, თითქოს ყვარელმა არ მიიღო ლევან ბერძენიშვილი, პირიქით, მას იქ ელოდებოდნენ, რის გამოც დააორგანიზეს ხალხი".
  • ის გამოდის ინიციატივით, დაორგანიზდნენ და გაემგზავრონ ყვარელში, რათა მოუსმინონ და მსურველებს მოასმენინონ ლევან ბერძენიშვილის ლექცია.
  • ენმ-ის ლიდერის განცხადებით კი ყვარელში პოლიციამ კიდევ ერთხელ დაუშვა კანონით დაუშვებელი.
  • "წარსულშიც და ახლაც, საქართველოს მოწინავე პატრიოტები მის უკეთეს ბედს განათლებას უკავშირებდნენ. ასე იყო ერეკლე მეფეც. არ შეიძლება მის სახელს ილია ჭავჭავაძეზე ლექციის ჩასაშლელად და განათლების საწინააღმდეგოდ იყენებდნენ", — დაწერა მან.

გარდა ამისა, სამმა პარლამენტარმა ყვარელში მომხდარზე გომელაურს სადეპუტატო კითხვით მიმართავს.

  • შინაგან საქმეთა მინისტრთან კითხვა თეონა აქუბარდიას, ხათუნა სამნიძესა და ნინო ბუჩუკურს აქვთ, დაიწყო თუ არა უწყებამ გამოძიება.

On.ge-მ შინაგან საქმეთა სამინისტროს მიმართა კითხვით, დაიწყო თუ არა გამოძიება.

  • მათ პასუხს მიღებისთანავე შემოგთავაზებთ.