დღეს, 22 დეკემბერს საქალაქო სასამართლოში მიხეილ სააკაშვილის სასამართლო პროცესი გაიმართა, რომელსაც ექსპრეზიდენტი დისტანციურ რეჟიმში დაესწრო.

რატომ არის მნიშვნელოვანი: ბოლოსდაბოლოს პენიტენციურმა სააკაშვილს სასამართლოზე დისტანციურად ჩართვის უფლება მისცა.

  • 14 დეკემბერს უწყებამ ონლაინ დასწრებაზე უარი მას შესაბამისი ტექნიკური მოწყობილობის არქონის გამო უთხრა.
  • მოგვიანებით, პენიტენციურმა სამსახურმა სააკაშვილის დამონტაჟებული და უხმო კადრები გაასაჯაროვა, რასაც ქართული ოცნების მორიგი მესიჯბოქსი მოჰყვა — მმართველმა გუნდმა ექსპრეზიდენტის "სიმულიანტობაზე" დაიწყო საუბარი.

კობახიძის თქმით, სიმულაციასაც სჭირდება ნიჭი და "ეს ძალიან უნიჭო სიმულაცია იყო". მისი თქმით, სააკაშვილის ვიზუალი, არაფრით განსხვავდება იმისგან, რაც პენიტენციურმა სამსახურის გამოქვეყნებულ კადრებში იყო ასახული.

  • "ის არის შერჩევით კვებაზე, რამაც გამოიწვია წონაში კლება და მას აქვს გაკეთებული კუჭის ოპერაცია, რამაც გამოიწვია, ასევე, წონის კლება, ეს არის ერთადერთი, რასაც ვხედავთ ჩვენ ამ ვიზუალიდან";
  • "დანარჩენი, რაც შეეხება სამედიცინო ჩვენებს, ეს უნდა იყოს დადასტურებული დიაგნოზი და ვერცერთი დიაგნოზი ვერ გამოაქვეყნეს, ეს ყველაფერი ადასტურებს, რომ ეს არის ცალსახა სიმულაცია", — ამბობს ქართული ოცნების თავმჯდომარე.