პარლამენტში ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე სახალხო დამცველობის კანდიდატს ლელა გაფრინდაშვილს უსმენენ.

რატომ არის მნიშვნელოვანი: გაფრინდაშვილი ომბუდსმენობის 19 კანდიდატს შორის ერთ-ერთია. ამ კვირაში ყველა მათგანს უნდა მოუსმინონ.

• კონსტიტუციაში ოჯახი განსაზღვრულია ქალისა და კაცის ერთობად. ეს ჩანაწერი 2018 წელს გაჩნდა, ინიციატორი კი ირაკლი ღარიბაშვილი იყო.
• არასამთავრობო ორგანიზაციების შეფასებით, ვიზალიბერალიზაციის სამოქმედო გეგმის ფარგლებში საქართველო ვალდებული იყო, მიეღო ანტიდისკრიმინაციული კანონი, რაც კონკრეტულად ქორწინების რეგულირების საკითხებს არ შეეხებოდა.

დეტალები: ომბუდსმენობის კანდიდატს უმეტესობა კითხვები ქართული ოცნებიდან დეპუტატმა დავით მათიკაშვილმა დაუსვა. ჰკითხა, არის თუ არა საქართველო სეკულარული სახელმწიფო, რაზეც გაფრინდაშვილმა უპასუხა:

• "დიახ, საქართველო სეკულარული სახელმწიფოა თავისი კანონმდებლობით, შინაარსით. [...] რაშიც ცივილიზაცია იგულისხმება, რომ არ არის თეოკრატია ვთქვათ, ან ავტოკრატია ან ასეთი რაღაც"
• შემდეგი კითხვა იყო, როგორ აფასებდა კანდიდატი ეკლესიის და სახელმწიფოს დამოკიდებულებას.
• "არ ვთვლი არანაირად, რომ რამე შეზღუდვები არსებობს და კონკრეტული კონფესია იზღუდება საქართველოში", — უპასუხა გაფრინდაშვილმა.
• "ორი წელი ვიმუშავე საზოგადოებრივ მაუწყებელში, რომელიც სრულიად სტერილურია რელიგიური კონფესიების მიმართ, ჩვენ შეიძლება კომერციულ ტელევიზიებს ვერ მოვთხოვოთ, რომ ყველა კონფესია წარმოადგინოს მაგრამ საზმაუს აქვს ვალდებულება და არ შეიძლება რომ ასეთი სტერილური იყოს ეს დაწესებულება", — ამბობს ომბუდსმენობის კანდიდატი.

ჩანაწერი კონსტიტუციაში: მათიკაშვილმა დასვა კითხვა — "კონსტიტუციაში გვაქვს ჩანაწერი ქორწინების შესახებ, თუ გაიხსენებთ როგორი ჩანაწერია, რა სიტყვებით არის?"

• "არ მახსოვს ზუსტი ფორმულირება როგორია, მე მგონი, ქალსა და კაცს შორის კავშირია ჩაწერილი", — უპასუხა გაფრინდაშვილმა.
• მათიკაშვილმა დააზუსტებინა, თვლიდა, თუ არა, რომ ეს სწორი ჩანაწერია, რაზეც ომბუდსმენობის კანდიდატი ამბობს, რომ "ამ მომენტისთვის სწორი ჩანაწერია".
• "ეს როგორი რაღაც არის იცით რომ განგსტერულ ფილმებში საკონტროლო გასროლა რომ არის, ასეთი კითხვაა. რისთვის არის … თქვენ მეკითხებით როგორ ვუყურებ მე სექსუალურ უმცირესობებს და მათ შორის ქორწინებას. ეს არის ძალიან საკამათო საკითხი, ეს უნდა იყოს საგანი ფართო საზოგადოეობრივი დისკუსიებისა და ფართო საზოგადოებრივი კონსენსუსის", — აცხადებს სახალხო დამცველობის კანდიდატი.

მათიკაშვილმა თქვა, რომ ეს ჩანაწერი არის იმ საკონსტიტუციო რეფორმის შედეგი, რომელიც განხორციელდა 2017-2018 წლებში განხორციელდა.

• "კონსტიტუცია შეივსო, პრაქტიკულად თავიდან შეიქმნა ახალი კონსტიტუცია, სადაც აბსოლუტურად გათვალისწინებული იყო ეს ახალი მომენტი, რომელსაც ვეთანხმებით და პირიქით, ჩვენი ინიციატივით განხორციელდა", — თქვა მათიკაშვილმა.

მოგვიანებით პარლამენტარი ხათუნა სამნიძის დამაზუსტებელ კითხვაზე, რატომ თვლის გაფრინდაშვილი, რომ "იმ მომენტისთვის" სწორი იყო ეს გადაწყვეტილება და რას გულისხმობდა "იმ მომენტში", სახალხო დამცველობის კანდიდატმა უპასუხა, რომ როცა "მომენტზე" საუბრობდა, გულისხმობდა იმ ვითარებას, "რაშიც ვიმყოფებით".

• სამნიძემ ასევე იკითხა, "არის თუ არა ამის კონსტიტუციაში ჩაწერა პოლიტიკური მანიპულაცია ყველანაირი მსჯელობის გარეშე, როცა ქვიარ ორგანიზაციებიც ეწინააღმდეგებიან ჩანაწერის გაკეთებას მაშინ, როცა არც არავინ ითხოვდა ამას
• სახალხო დამცველობის კანდიდატმა კი აღნიშნა, რომ ჩაწერის მომენტში არ ახსოვს დისკუსიები — "ამ ჩაწერასთან დაკავშირებითაც ვეთანხმები დისკუსიებს. ნებისმიერი, რაც კეთდება ისეთ ფუნდამენტურ დოკუმენტში, როგორიც კონსტიტუციაა, ასევე უნდა იყოს ფართო საზოგადოებრივი განხილვების და კონსენსუსის საგანი. თუ განხილვები არ ყოფილა, ესე იგი, არ არის სწორი".