ინფორმაციას ამის შესახებ Meduza ავრცელებს.

რატომ არის მნიშვნელოვანი: 30 სექტემბერს ვლადიმერ პუტინმა უკრაინის ოკუპირებული რეგიონების, ლუგანსკის, ზაპოროჟიესა, ხერსონსა და დონეცკის ანექსია გამოაცხადა. პუტინმა იკადრა და ამ ცერემონიიდანაც მოუწოდა უკრაინას დაუყოვნებლივ შეწყვიტოს ცეცხლი და დაბრუნდეს მოლაპარაკების მაგიდასთან;

  • უკრაინამ კი თქვა, რომ პუტინი ცდილობს ტერიტორიების ხელში ჩაგდებას, რომელსაც ადგილზე ფიზიკურად არც კი აკონტროლებს — საერთაშორისო საზოგადოებამ დაგმო რუსეთის ქმედება და ე.წ რეფერენდუმები არ აღიარა;
  • იმავე დღეს ზელენსკიმ NATO-ში დაჩქარებული გაწევრიანების განაცხადს მოაწერა ხელი — ზელენსკის განცხადებით, მათ უკვე აიღეს გზა ნატოსკენ და უკვე დაამტკიცეს ალიანსის სტანდარტებთან თავსებადობა.

დეტალები: მედიის ცნობით, ვოლოდიმირ ზელენსკიმ ხელი მოაწერა უკრაინის სუვერენიტეტისა და ტერიტორიული მთლიანობის დამრღვევი აქტების ბათილობის შესახებ განკარგულებას.

  • დოკუმენტი ეხება პუტინის მიერ ყირიმის "დამოუკიდებლობის" ცნობას, ასევე, დონეცკისა და ლუგანსკის ე.წ. სახალხო რესპუბლიკებად გამოცხადებას და ხერსონისა და ზაპოროჟიეს რეგიონებს;
  • ზელენსკის განკარგულებაში ასევე მითითებულია, რომ უკრაინის ტერიტორია მთლიანი და ურყევია მის საერთაშორისოდ აღიარებულ საზღვრებში და უკრაინის სუვერენიტეტი მის სრულ ტერიტორიაზე ვრცელდება.

მანამდე ზელენსკიმ ოფიციალურად თქვა უარი ვლადიმერ პუტინთან მოლაპარაკებებზე — მან ხელი მოაწერა ეროვნული უსაფრთხოებისა და თავდაცვის საბჭოს გადაწყვეტილებას, რომელიც რუსეთის ამჟამინდელ პრეზიდენტთან დიალოგს გამორიცხავს.

  • განკარგულება ამტკიცებს NATO-ში დაჩქარებული წესით გაწევრიანების შესახებ უკრაინის განაცხადსაც;
  • ასევე, პუნქტს, რომლის თანახმადაც, უკრაინამ უსაფრთხოების გარანტიების ისეთი სისტემა უნდა მოამზადოს, რომ რუსეთის აგრესიის მოგერიება გარდაუვალად უზრუნველყოს, გაზარდოს სამხედრო და ტექნიკური დახმარება უკრაინისთვის, რათა ქვეყნის თავდაცვითი შესაძლებლობები გაძლიერდეს;
  • ამასთან, დოკუმენტში რეკომენდაციაა, რომ უკრაინის რადამ იმ კანონპროექტების მიღება დააჩქაროს, რომელიც შესაბამის სანქციებსა და რუსეთის ესკალაციის საპასუხო ქმედებებს ეხება.