ამის შესახებ კრელის პრესსპიკერმა ჟურნალისტებთან საუბრისას განაცხადა.

რატომ არის მნიშვნელოვანი: დღეს უკრაინის პრეზიდენტმა ხელი მოაწერა ეროვნული უსაფრთხოებისა და თავდაცვის საბჭოს გადაწყვეტილებას და ვლადიმერ პუტინთან მოლაპარაკებები ოფიციალურად გამორიცხა.

  • აქამდე ვოლოდიმირ ზელენსკი მზადყოფნას გამოთქვამდა და პუტინთან პირისპირ შეხვედრაზეც თანახმა იყო.
  • თუმცა მას შემდეგ, რაც რუსეთმა უკრაინის 4 რეგიონის ანექსია გამოაცხადა, მან თქვა, რომ დიალოგისთვის მზად არის, მაგრამ რუსეთის სხვა პრეზიდენტთან.

პესკოვს ჰკითხეს, შეიძლება თუ არა "სამხედრო ოპერაცია" დასრულდეს დოკუმენტის მიღებით, რომელშიც კიევი არ მონაწილეობს. რაზეც მან განაცხადა, რომ ამისთვის 2 მხარეა საჭირო.

  • "აბა, რა შეგვიძლია ვთქვათ ახლა? ჩვენ ან დაველოდებით ამჟამინდელი პრეზიდენტის პოზიციის შეცვლას, ან დაველოდებით უკრაინის მომავალ პრეზიდენტს, რომელიც შეცვლის თავის პოზიციებს უკრაინელი ხალხის ინტერესებიდან გამომდინარე", — თქვა კრემლის პრესსპიკერმა.

ზელენსკის განკარგულება ამტკიცებს NATO-ში დაჩქარებული წესით გაწევრიანების შესახებ უკრაინის განაცხადსაც.

  • ასევე, პუნქტს, რომლის თანახმადაც, უკრაინამ უსაფრთხოების გარანტიების ისეთი სისტემა უნდა მოამზადოს, რომ რუსეთის აგრესიის მოგერიება გარდაუვალად უზრუნველყოს, გაზარდოს სამხედრო და ტექნიკური დახმარება უკრაინისთვის, რათა ქვეყნის თავდაცვითი შესაძლებლობები გაძლიერდეს;
  • ამასთან, დოკუმენტში რეკომენდაციაა, რომ უკრაინის რადამ იმ კანონპროექტების მიღება დააჩქაროს, რომელიც შესაბამის სანქციებსა და რუსეთის ესკალაციის საპასუხო ქმედებებს ეხება.