ამის შესახებ ჩეჩნეთის ლიდერი ტელეგრამზე წერს და ვიდეოსაც აქვეყნებს, რომელშიც ჩანს, როგორ გადიან მისი შვილები წვრთნებს.

რატომ არის მნიშვნელოვანი: კადიროვის რეჟიმი ცნობილია ადამიანის უფლებების დარღვევით და ვლადიმერ პუტინის წამოწყებული ომისადმი მხურვალე მხარდაჭერით.

  • ახლა საკუთარი პოლიტიკური ინტერესების დასაცავად და ერთგულების დასამტკიცებლად ის არასრულწლოვან ბავშვებს სასიკვდილო საფრთხეში აგდებს.
  • "არასრულწლოვანმა ასაკმა ხელი არ უნდა შეუშალოს ჩვენი სამშობლოს დამცველების აღზრდას", — წერს ჩეჩნეთის ლიდერი.

დეტალები: კადიროვი ამბობს, რომ ასაკის მიუხედავად, მისმა შვილებმა სამხედრო მომზადება დიდი ხნის წინ, თითქმის ბავშვობიდან დაიწყეს.

  • ის ამტკიცებს, რომ არ ხუმრობს და ბავშვები "სპეციალურ სამხედრო ოპერაციაში" მალე ჩაერთვებიან, თანაც ფრონტის ყველაზე რთულ მონაკვეთზე.
  • "ყოველთვის მჯეროდა, რომ ნებისმიერი მამის მთავარი მიზანია შვილებში ღვთისმოსაობა დანერგოს და ოჯახის, ხალხის, სამშობლოს დაცვა ასწავლოს. თუ მშვიდობა გინდა, მოემზადე ომისთვის! დროა გამოიჩინონ თავი რეალურ ბრძოლაში და მათ ამ სურვილის მხოლოდ მივესალმები", — წერს კადიროვი.

მიზეზი: კადიროვი არ მალავს, რომ შვილებს ომში სხვებთან თავის გამოსაჩენად უშვებს. პოსტში ის კრიტიკოსებს მიმართავს, რომლებიც მობილიზაციას აპროტესტებენ და ამბობენ, რომ არ სურთ საკუთარი ახლობლების ომში გაშვება, როცა გადაწყვეტილების მიმღები პირები იმავეს არ აკეთებენ.

  • "უახლოეს მომავალში გექნებათ საშუალება დაიკავოთ პოზიციები ბიჭებთან ერთად და თავად დარწმუნდეთ, რომ ახმატი არის ძალა! ადგილზე აჩვენეთ თქვენი სული, იდეოლოგია და საერთოდ რას წარმოადგენთ", — წერს ის და სექსისტური შინაარსის ფრაზებით ლანძღავს კრიტიკოსებს.
  • "დარწმუნებულები ვართ, რომ არასრულწლოვანი ბავშვებიც კი შეძლებენ თქვენს გაცამტვერებას, რადგან არც სული გაქვთ, არც პატივი და არც ღირსება. მოიცადეთ! — ამბობს კადიროვი პოსტის დასასრულს.