პარტიის განცხადებით, პროტესტის ნიშნად ელჩის საგარეო უწყებაში დაბარება მსოფლიოში შედარებით გავრცელებული პრაქტიკაა და არ არის მომხდარი ფაქტის, საქართველოს ტერიტირიული მთლიანობის ფაქტობრივი ხელყოფის, თანაბარწონადი ღონისძიება.

დეტალები: მათ მიაჩნიათ, რომ საჭიროა ბელარუსში საქართველოს ელჩის, ვალერი კვარაცხელიას გამოწვევა და უნდა იყოს უზრუნველყოფილი, რომ ელჩი ვითარების გარკვევამდე და ლუკაშენკოს რეჟიმის მხრიდან აფხაზეთთან მიმართებით თანამშრომლობითი პოზიციის შეცვლამდე არ დაბრუნდება.

• გარდა ამისა, პარტია აცხადებს, რომ საჭიროა ურთიერთბის გაწყვეტა ბელარუსის კაგებესთან: "აღსანიშნავია, რომ საქართველოს ხელისუფლება ბელარუსთან დემოკრატიული ქვეყნისთვუს შეუფერებლად მჭიდრო კავშირს, მაგალითად ბელარუსის კგბ-სთან ოფიციალურ თანამშრომლობას, მუდამ ამართლებდა იმით, რომ მსგავსი ნაბიჯი საჭიროა ბელარუსის აფხაზეთისგან დისტანცირებისთვის".

• დროა იხსენებს, რომ საქართველომ მიხელ სააკაშვილის რეფორმების აღმასრულებელი კომიტეტის თავმჯდომარედ დანიშვნის გამო 2020 წელს ელჩი გაიწვია სტრატეგიული პარტნიორი ქვეყნიდან, უკრაინიდან.

• "საქართველოს მთავრობის შემდგომი ნაბიჯებით კიდევ უფრო ცხადი გახდება, რამდენად მნიშვნელოვანია მათთვის ტერიტორიული მთლიანობის პრინციპი ქართულ ოპოზიციასთან წინააღმდეგობის პრინციპთან შედარებით", — აცხადებენ პარტიაში.

რატომ არის მნიშვნელოვანი: ბელარუსს საქართველოს ოკუპირებული ტერიტორიების დამოუკიდებლობა აღიარებული არ აქვს და საქართველოსთან დიპლომატიურ ურთიერთობებს ინარჩუნებს.

• ბელარუსის პრეზიდენტის ეს ნაბიჯი, შესაძლოა, საქართველოსთან ურთიერთობის დაძაბვის მიზეზი გახდეს.
• ლუკაშენკოს აფხაზეთში ჩასვლა ნიშნავს, რომ მან დაარღვია საქართველოს კანონი ოკუპაციის შესახებ, რომლის თანახმად ზუგდიდისა და გორის მუნიციპალიტეტების მიმართულებების გარდა, ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისათვის აკრძალულია და ისჯება საქართველოს სისხლის სამართლის კოდექსით.

რა ვიცით ლუკაშენკოს ჩასვლაზე: აფხაზური მედიების ინფორმაციით, ლუკაშენკო დე ფაქტო პრეზიდენტს ბიჭვინთის "სახელმწიფო აგარაკზე" შეხვდა. ეს ოფიციალიურად დაანონსებული არ ყოფილა, მაგრამ წინ უძღოდა ლუკაშენკოს ვიზიტი სოჭში, სადაც ვლადიმერ პუტინს ესაუბრა.

• ბელარუსის პრეზიდენტს არ დაუმალავს, რომ აფხაზეთში მისი ჩასვლა პუტინის ინიციატივაა და თქვა: "გუშინ ჩვენ განვიხილეთ აფხაზეთის პრობლემები ჩვენს უფროს ძმასთან, ვლადიმერ პუტინთან ერთად. ბევრი ვიმსჯელეთ ამ საკითხებზე, ღამემდე და მივედით ერთ დასკვნამდე, რომ აფხაზეთის მიტოვება არ შეიძლება".
• გავრცელებული ფოტო-ვიდეოების მიხედვით, მას ცეკვით და ზეიმით დახვდნენ და ისიც თბილად მიესალმა ბჟანიას.
• დე ფაქტო რეჟიმის ვიდეოებში ლუკაშენკოს არცერთხელ არ მოუხსენებია აფხაზეთი, როგორც რესპუბლიკა, მაგრამ ორმხრივი ურთიერთობების აუცილებლობაზე ისაუბრა და თქვა: "ჩვენ მივედით ერთ დასკვნამდე, რომ აფხაზეთი არის, მას რუკიდან ვერ წაშლი, ვერანაირი სანქცია ამას ვერ იზამს".
• "ჩვენ გვინდა დავამყაროთ არა მხოლოდ მეგობრობის ხიდი, არამედ ძალიან სერიოზული ურთიერთობები", — განაცხადა მან და თან ამტკიცებდა, თითქოს ამ ნაბიჯს იმის გამო არ დგამას, რომ ბელარუსს პრობლემები შეექმნა.
• გარდა ამისა, ლუკაშენკო ამტკიცებდა იმასაც, რომ არავისთვის ცუდი არ უნდათ, მათ შორის, არც საქართველოსთვის.
• "ჩვენ ჩამოვედით სიკეთით. თუ რამით შეგვიძლია თქვენი დახმარება, თან ეს იქნება ორმხრივად მომგებიანი თანამშრომლობა, მისი მიმართულებები კი არსებობს, ჩვენ ამას გავაკეთებთ", — განაცხადა მან.

საგარეო საქმეთა სამინისტრო ღრმა შეშფოთებას გამოხატავს და მკაცრად გმობს საქართველოს სახელმწიფო საზღვრის დარღვევით ლუკაშენკოს "ვიზიტს" ოკუპირებულ აფხაზეთის რეგიონში, რაც უხეშად არღვევს საერთაშორისო სამართლის ფუნდამენტურ პრინციპებსა და ნორმებს.

• მათი თქმით, "პროტესტის ნიშნად" ბელარუსის ელჩი დაიბარეს და დამატებითი განმარტებები მოსთხოვეს.
• "ბელარუსის მხარეს მოვუწოდებთ, პატივი სცეს სუვერენული სახელმწიფოს ტერიტორიულ მთლიანობას საერთაშორისოდ აღიარებული საზღვრების ფარგლებში და არ განახორციელოს ისეთი ქმედებები, რომლებიც ეწინააღმდეგება საერთაშორისო სამართლის ფუნდამენტურ პრინციპებს", — აცხადებენ უწყებაში.

პრეზიდენტმა, სალომე ზურაბიშვილმა მკაცრად დაგმო ლუკაშენკოს საქციელი.

• " ეს საქართველოს ოკუპირებული ტერიტორიების შესახებ კანონის, ჩვენი ორმხრივი ურთიერთობებისა და საერთაშორისო სამართლის პრინციპების დაუშვებელი დარღვევაა", — განაცხადა მან.

ოპოზიციამ ასევე გააკრიტიკა ლუკაშენკო. ლელო აცხადებს, რომ საჭიროა სწრაფი რეაგირება და 5-პუნქტიან გეგმას ავრცელებს.

• მოქალაქეების ლიდერის განცხადებით, ძალიან პრინციპული ნაბიჯებია გადასადგმელი და ელისუფლებამ არ უნდა ჩარგოს თავი ჩირგვებში.

ყოფილი პრემიერმინისტრები გიორგი გახარია და გიორგი კვირიკაშვილიც გმობენ ლუკაშენკოს აფხაზეთში ჩასვლას.

• "ეს არის საქართველოს ტერიტორიული მთლიანობის და სუვერენიტეტის აშკარა დარღვევა, რომელსაც მკაცრი პასუხი უნდა გაეცეს საქართველოს მთავრობისა და საერთაშორისო საზოგადოების მხრიდან", — აცხადებს გახარია.
• "ბელარუსის მარგინალიზებული "ლიდერის" ლუკაშენკოს სამარცხვინო ნაბიჯი — იმოქმედოს, როგორც რუსეთის სახელმწიფოს უფრო მარგინალიზებული დამხრჩვალი მეთაურის, პუტინის მარიონეტმა", — წერს კვირიკაშვილი.