ამის შესახებ კახა კალაძემ თბილისის მთავრობის სხდომაზე ისაუბრა.

რატომ არის მნიშვნელოვანი: თბილისში ბოლო რამდენიმე დღის განმავლობაში, მას შემდეგ, რაც სწავლა დაიწყო, საცობების პრობლემაა.

  • მოქალაქეები აცხადებენ, რომ ერთი პუნქტიდან მეორეში გადაადგილებისათვის იმაზე დიდი დრო სჭირდებათ, ვიდრე ადრე;
  • პარალელურად, გადაადგილების პრობლემებია მეტროებშიც.

დეტალები: კალაძემ ისაუბრა, რომ მეტროში განსაკუთრებული პრობლემები პიკის საათებში იქმნება — მან გამოყო ახმეტელი და სადგურის მოედანი, სადაც ხალხის დიდი ნაკადის გამო, მოქალაქეები გადაადგილებას ხშირად ვერ ახერხებენ.

  • "პირველად, შეიძლება, სატესტო რეჟიმში გამოვიყენოთ განვითარებული ქვეყნების მაგალითები, არ ვიცი, ლონდონის მეტროთი შეიძლება ბევრს უმგზავრია და ვიცით, თუ როგორ ხდება ნაკადების მართვა";
  • "ეს, შეიძლება, პირველ ეტაპზე გარკვეული დისკომფორტი იყოს, შეიძლება, ვიღაცისთვის სასაცილო, მაგრამ სასაცილოდ ნამდვილად არ გვაქვს საქმე";
  • "ამიტომ დაიწყეთ ყველანაირად ყველა ძალის გამოყენება და ნახეთ ყველა შესაძლებლობა, როგორ შეიძლება ნაკადების მართვა, თუ გამოგვივა, ვნახოთ სატესტო რეჟიმში";
  • "პარალელურად, ჩართეთ საერთაშორისო ექსპერტებიც და დავიწყოთ მუშაობა არსებული გვირაბის გაგანიერებასა და მოწესრიგებაზე, იმისთვის, რომ პრობლემას არ წარმოადგენდეს ამ გვირაბში გადაადგილება".

კალაძემ ისაუბრა თბილისში არსებულ საცობებზე და აღნიშნა, რომ პრობლემების მიუხედავად, რომელიც ინფრასტრუქტურულ სამუშაოებთან ერთად, სხვა ფაქტორებითაც არის გამოწვეული, "თბილისს ჰყავს ყველაზე ახალი და ყველაზე მოწესრიგებული საზოგადოებრივი ტრანსპორტი".

  • "ხომ არ დაგვავიწყდა, რა ვითარება იყო ე.წ. მარშუტკებში? ცხვირ-პირის მტვრევა რომ მიდიოდა: "კონდიციონერი ჩართე, კონდიციონერი არ მუშაობას, დავიწვით ხალხი". ეს წარსულს ჩავაბარეთ თქვენი მხარდაჭერით და თანადგომით";
  • "გაძლევთ პირობას, რომ საზოგადოებრივი ტრანსპორტი ჩვენს ქალაქში იქნება ყველაზე სწრაფი, ყველაზე კომფორტული და ყველაზე ხელმისაწვდომი".