ევროკავშირის სასაზღვრო სააგენტოს Frontex-ის განცხადებით, 19-25 სექტემბრის მონაცემებით EU-ში რუსეთის 66 000 მოქალაქე შევიდა, რაც 30%-ით მეტია წინა კვირასთან შედარებით.

რატომ არის მნიშვნელოვანი: 21 სექტემბერს პუტინმა რუსეთში ნაწილობრივი მობილიზაცია გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ, საზღვრებთან და აეროპორტებში რამდენიმესაათიანი რიგებია.

• აქამდე რუსეთი უარყოფდა და ცდილობდა დაემალა, რომ უკრაინაში ფრონტის ხაზზე პრობლემები ჰქონდა და პერსონალის დიდი დანაკლისი განიცადა;
• ამ გადაწყვეტილებით კი გამოჩნდა, რომ რუსეთი არსებული რესურსებით უკრაინულ ძალებს ვერ უმკლავდება.

დეტალები: როგორც Frontex წერს, რუსეთის მოქალაქეების უმეტესობა ევროკავშირში ფინეთისა და ესტონეთის სასაზღვრო გამშვები პუნქტებით შედის.

• 19 სექტემბერს ესტონეთმა, ლატვიამ, ლიეტუვამ და პოლონეთმა დაიწყეს შესვლის შეზღუდვების დაწესება რუსეთის მოქალაქეებისთვის, რომლებიც მოგზაურობენ მხოლოდ ტურისტული ან დასასვენებელი მიზნით. მსგავსი შეზღუდვები მოქმედებს ფინეთში.
• 21 სექტემბერს ლატვიის საგარეო საქმეთა მინისტრმა თქვა, რომ ქვეყანა არ მიიღებს რუსეთის მოქალაქეებს, რომლებიც მობილიზაციას გაექცევიან.

რიცხვებში: Frontex-ის ცნობით, უკრაინაში რუსეთის შეჭრის დაწყებიდან, უკვე 1 303 000-ზე მეტი რუსეთის მოქალაქე შევიდა ევროკავშირში მისი სახმელეთო საზღვრების გავლით.

• ამავდროულად, 1 273 000-ზე მეტი რუსეთის მოქალაქე დაბრუნდა რუსეთში ევროკავშირთან სახმელეთო საზღვრების გავლით.
• ამასთან, სააგენტო აცხადებს, რომ გასული კვირის რუსეთის მოქალაქეთა უმეტესობა ფინეთსა და ესტონეთში ჩავიდა. ბოლო ოთხი დღის განმავლობაში ფინეთში რუსეთის 30 000 მოქალაქე ჩავიდა.

Frontex-ის შეფასებით, საზღვრის უკანონო გადაკვეთა სავარაუდოდ გაიზრდება, თუ რუსეთის ფედერაცია გადაწყვეტს საზღვრის დახურვას პოტენციური წვევამდელებისთვის.

• "მოკლევადიან პერსპექტივაში, ჩვენ სავარაუდოდ ვნახავთ რუსეთის მოქალაქეების მზარდ რაოდენობას, რომლებიც ჩამოდიან ევროკავშირის სასაზღვრო პუნქტებზე რუსეთის ფედერაციაში მიმდინარე მობილიზაციასთან დაკავშირებული გაურკვევლობის გამო";
• "გრძელვადიან პერსპექტივაში შეიძლება ვიხილოთ არალეგალური საზღვრების გადაკვეთის ზრდა ევროკავშირის გარე საზღვრებზე რუსეთთან და უკრაინასთან, ისევე როგორც ევროკავშირში უკანონო ყოფნის ზრდა წევრ ქვეყნებში უკვე მყოფი რუსეთის მოქალაქეების მიერ".

საქართველო: შსს-მ გუშინ, 27 სექტემბერს გამოაქვეყნა მონაცემები. მობილიზაციის ამოქმედებამდე, საქართველოს საზღვარი ყველა გამშვები პუნქტიდან გადმოკვეთა და გადაკვეთა:

• 17 სექტემბერს: 6 986 — 7 406;
• 18 სექტემბერს: 6 606 — 6 743;
• 19 სექტემბერს: 6 411 — 6 782;
• 20 სექტემბერს: 5 603 — 6 199 პირმა.

მობილიზაციის გამოცხადების შემდეგ, მონაცემები გაზრდილია. მაგალითად, 21 სექტემბერს რუსეთიდან საზღვარი გადმოკვეთა 6 402-მა და გადაკვეთა 6 011-მა პირმა. დანარჩენ დღეებში შემოსულთა და გასულთა სტატისტიკა ასეთია:

• 22 სექტემბერს: 6 150 — 6 050;
• 23 სექტემბერს: 9 307 — 6 214;
• 24სექტემბერს: 9 330 — 6 249;
• 25 სექტემბერს: 11 143 — 5 519;
• 26 სექტემბერს: 10 804 — 4 947.