ამ საკითხზე თეთრი სახლის სპიკერმა, კარინ ჟან-პიერმა ისაუბრა.

რატომ არის მნიშვნელოვანი: 21 სექტემბერს პუტინმა რუსეთში "ნაწილობრივი მობილიზაცია" გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ, საზღვრებთან და აეროპორტებში რამდენიმესაათიანი რიგებია.

  • აქამდე რუსეთი უარყოფდა და ცდილობდა დაემალა, რომ უკრაინაში ფრონტის ხაზზე პრობლემები ჰქონდა და პერსონალის დიდი დანაკლისი განიცადა;
  • ამ გადაწყვეტილებით კი გამოჩნდა, რომ რუსეთი არსებული რესურსებით უკრაინულ ძალებს ვერ უმკლავდება.

დეტალები: თეთრი სახლის სპიკერის თქმით, აშშ მიესალმება რუსებს, რომლებიც ვლადიმერ პუტინის ომს გამოექცნენ და თავშესაფარს ითხოვენ.

  • "ჩვენ გვჯერა, რომ ეროვნების მიუხედავად, მათ შეუძლიათ აშშ-ში თავშესაფარი მოითხოვონ";
  • "მათი მოთხოვნა ინდივიდუალურად განიხილება".

საქართველოს სტატისტიკა: შინაგან საქმეთა სამინისტრომ რუსეთიდან შემოსულთა რაოდენობის შესახებ ბოლო 10 დღის მონაცემები გამოაქვეყნა — მობილიზაციის გამოცხადების შემდეგ, შემოსულთა და გასულთა რაოდენობა ასეთია:

  • 21 სექტემბერი: 6 402 — 6 011;
  • 22 სექტემბერი: 6 150 — 6 050;
  • 23 სექტემბერი: 9 307 — 6 214;
  • 24სექტემბერი: 9 330 — 6 249;
  • 25 სექტემბერი: 11 143 — 5 519;
  • 26 სექტემბერი: 10 804 — 4 947.