სახელმწიფო უსაფრთხოების სამსახური თავდაცვის სამინისტროს ყოფილი სამხედრო მოსამსახურის, მიხეილ ქამხაძის პირადი საქმის მასალების, უკრაინის ქალაქ ლისიჩანსკის ტერიტორიაზე, რუსეთის ფედერაციის შეიარაღებული ძალების წარმომადგენლების ხელში აღმოჩენის შესახებ გამოძიების შუალედურ შედეგებს ავრცელებს.

რატომ არის მნიშვნელოვანი: 9 აგვისტოს გავრცელდა ინფორმაცია, რომ ქართველი სამხედროს პირადი საქმე ოკუპანტების ხელშია.

  • რუსული პროპაგანდისტული მედიის სიუჟეტში ამტკიცებენ, რომ "გათავისუფლებულ ტერიტორიებზე" პოულობენ უცხოელი დაქირავებულების კონფლიქტში მონაწილეობის დამადასტურებელ დოკუმენტებს.

რას ამბობს სუს: უწყების ცნობით, საქმე ხელუხლებელია, გატანის ან ასლების გადაღების ფაქტი არ იკვეთება, მიხეილ ქამხაძის შესახებ რაიმე სახის დოკუმენტი კი თავდაცვის სამინისტროში არ ინახება.

  • მათივე თქმით, რუსული მედიასაშუალებებით გავრცელებულ ქალაქ ლისიჩანსკში აღმოჩენილ სამხედრო მოსამსახურის პირად საქმეს, გლდანის რაიონის სამხედრო განყოფილებაში დაცულ მიხეილ ქამხაძის პირად საქმესთან კავშირი არ გააჩნია;
  • ამასთან, სუს აღნიშნავს, რომ ეს, შესაძლოა, წარმოადგენდეს მიხეილ ქამხაძის მიერ 2016 წელს პირადად შეგროვებული დოკუმენტების კრებულს, რაც მან გამოკითხვის დროს არ უარყო;
  • განცხადების მიხედვით, გავრცელებული დოკუმენტების უმრავლესობა სამხედრო აღრიცხვის, გაწვევისა და მობილიზაციის სამსახურში დაცული სამხედრო მოსამსახურის პირადი საქმის შემადგენელ დოკუმენტებთან იდენტური არ არის;
  • ასევე, ისინი ამბობენ, რომ მედიასაშუალებებით გავრცელებული მასალები შეიცავს ზოგიერთ ისეთ ცნობას და ინფორმაციას, რაც არასდროს დაფიქსირებულა მიხეილ ქამხაძის სამხედრო მოსამსახურის პირად საქმეში.

გარდა ამისა, სუს-ის თქმით, გამოძიებით დადგინდა, რომ გავრცელებულ ვიდეო-მასალაში ასახული არცერთი დოკუმენტი არ შეიცავს სახელმწიფო საიდუმლოებას.

  • "აღნიშნული კამპანია არის სახელმწიფოს წინააღმდეგ მიზანმიმართული პროვოკაცია, რომელიც პირდაპირ ემსახურება როგორც ქართული სპეცსამსახურის, ისე თავდაცვის სამინისტროს დისკრედიტაციის მცდელობას".