საზოგადოებრივი მაუწყებლის 2017-2018 წლის საეთერო სეზონისთვის მხატვრული სერიალების კონკურსში საუკეთესო სცენარები გამოვლინდა.

მაუწყებლის ცნობით, მძაფრსიუჟეტიანი დეტექტივის ჟანრში გამარჯვებული ილია ჯიბღაშვილის და ბესო სოლომონაშვილის "ვაკანსია მკვლელის თანამდებობაზე" გახდა, მელოდრამის ჟანრში კი სანდრო ჯანდიერისა და ბასა ჯანიკაშვილის "ლივლივმა" გაიმარჯვა.

კონკურსში სულ 45 განაცხადი შევიდა, მეორე ტურში კი აქედან 15 მონაწილე გადავიდა. გამარჯვებულები სცენარების შესაფასებლად და შესარჩევად შექმნილმა კომისიამ გამოავლინა, რომელსაც საზოგადოებრივი მაუწყებლის მედია წარმოების დირექტორი პაატა ქურდაძე თავმჯდომარეობდა.

აღნიშნული სცენარების შესახებ კომისია რეკომენდაციით მიმართავს საზოგადოებრივი მაუწყებლის გენერალურ დირექტორს, ვასილ მაღლაფერიძეს, რომელიც პროექტის განხორციელებასთან დაკავშირებით საბოლოო გადაწყვეტილებას მიიღებს.

საზოგადოებრივმა მაუწყებელმა სერიალების სცენარების შესარჩევი კონკურსი 13 არპილს გამოაცხადა. მაუწყებელი რვათვიან ხელშეკრულებაში ორ სცენარისტსა და ორ რეჟისორს ჯამში 108 ათას ლარს გადაუხდის.