თბილისის საქალაქო სასამართლომ ფოტოგრაფების საქმეზე ბრალდებული, დავით დევნოზაშვილი წინასწარ პატიმრობაში დატოვა.

პროკურორის თქმით, მოსამართლემ სრულად გაიზიარა ბრალდების მხარის არგუმენტები, რომელიც აპელირებდა მოწმეებზე ზემოქმედებისა და მიმალვის საფრთხეებზე:

"ეს ბრალდების მხარის მხრიდან კვლავ იქნა დასაბუთებული იმ მოტივით, რომ მოწმეთა ზემოქმედების საფრთხე სახეზეა იმ მხრივ, რომ დასაკითხი არიან საქმის მნიშვნელოვანი მოწმეები."

საქართველოს კანონმდებლობის თანახმად, სასამართლომ ყოველ ორ თვეში უნდა იმსჯელოს ბრალდებული წინასწარი პატიმრობის მიზანშეწონილობაზე.

პროკურატურამ 6 დეკემბერს გამართულ ბრიფინგზე განაცხადა, რომ დავით დევნოზაშვილი იყო ის პირი, რომელმაც 2011 წელს ჯაშუშობაში ბრალდებულ ფოტოგრაფებს იძულებითა და შანტაჟით დააწერინა აღიარებითი ჩვენებები.

2011 წლის 7 ივლისს, შსს კონტრდაზვერვის დეპარტამენტის თანამშრომლებმა ჯაშუშობის ბრალდებით, ღამის საათებში, საგანგებოდ ჩატარებული სპეცოპერაციის გზით, საკუთარ საცხოვრებელ სახლებში დააკავეს ზურაბ ქურციკიძე, გიორგი აბდალაძე, ირაკლი გედენიძე და ნათელა გედენიძე.