25 ივლისს, 18:00 საათიდან, თიბისი კონცეპტის მულტიფუნქციური სივრცე მარჯანიშვილის 7 ნომერში ფრანგი ფოტოგრაფის, ნატალი ტუფენკჯიანის გამოფენას "Women of Georgia, Pearls of The Caucasus" უმასპინძლებს.

პროექტი ნატალი ტუფენკჯიანის ჟან-მარკ ჰოფმანთან კოლაბორაციას წარმოადგენს.

ბოლო ორი წელია, ნატალი ტუფენკჯიანი ბუნებრივი განათების პორტრეტული ფოტოგრაფიითაა დაკავებული და ცდილობს, თავის ობიექტივში საქართველოში მცხოვრები ქალების მრავალფეროვნება და განსხვავებულობა ასახოს. მის ფოტოებში არაერთი მამაცი, თავდადებული, ძლიერი, თუ გულისხმიერი ქალი შეგიძლიათ იხილოთ. გარდა ამისა ტუფენკჯიანს გადაღებული აქვს ხელოვანი ქალების პორტრეტები. ყველა ეს პორტრეტი გვიჩვენებს, რომ ეს განსხვავებული პროფესიისა თუ სოციალური წარმომავლობის ქალი, პრაქტიკულ უნარ-ჩვევებთან ერთად, საკუთარ თავში საუკუნოვანი ტრადიციების მატარებელია. ტუფენკჯიანმა მათი ხასიათის და ჭეშმარიტი არსის მოხელთება ფოტოგრაფიის საშუალებით შეძლო.

გამოფენაზე წარმოდგენილი პორტრეტები საქართველოს ისტორიის უმნიშვნელოვანეს ნაწილს მოგვითხრობენ. თითოეული ფოტო გვახსენებს ქვეყნის აღმშენებლობაში ქალების გამორჩეულ როლს, მათ მიერ საქართველოს განვითარებაში შეტანილ წვლილს და გაწეულ სამუშაოს იმისთვის, რომ საქართველო საზღვარგარეთ ღირსეულად წარმოჩენილიყო. საქართველოს ისტორია მათთან ერთად და მათ მიერ იწერებოდა. მნიშვნელობა არ აქვს რა პერიოდზე ვისაუბრებთ, იქნება ეს საქართველოს დაარსების ეპოქა, წმინდა ნინოს დრო თუ ჩვენი თანამედროვეობა.

"Women of Georgia, Pearls of The Caucasus" ფართომასშტაბიანი პროექტია და ავტორი კვლავ აგრძელებს მასზე მუშაობას. გამოფენაზე წარმოდგენილი პორტრეტები ამ პროექტის მხოლოდ პირველი ეტაპია. ტუფენკჯიანი მუშაობის გაგრძელებას მომავალშიც აპირებს.

ნატალი ტუფენკჯიანმა პირველი პორტრეტი 1986 წელს გადაიღო. მისი მოდელი ახალგაზრდა ფოტოგრაფი იყო, რომელმაც ნატალის ობიექტივში საკუთარი თავი, თავისი ხასიათის ორიგინალური შტრიხები თავიდან აღმოაჩინა. სწორედ ასე ჩამოყალიბდა ტუფენკჯიანის სწრაფვა და გატაცება პორტრეტული ფოტოგრაფიისადმი; მას შემდეგ, მისი სურვილი, ფოტოგრაფიის საშალებით ადამიანების ავთენტურობა ასახოს, არსად გამქრალა. ნატალი ტუფენკჯიანი უკვე წლებია, სწორედ ამ მიზნით მოგზაურობს მსოფლიოს სხვადასხვა კუთხეში — ახალი გამოცდილებებისა და საოცარი აღმოჩენების იმ სამყაროში, რომელიც მისი სათქმელის სხვადასხვა ხერხით გამოსახატად უამრავ ძალისხმევასა და თავდადებას მოითხოვს.

მახვილმა მზერამ და უშრეტმა ტემპერამენტმა ტუფენკჯიანს მოდის სამყაროშიც გაუკვალა გზა — იგი ფოტოგრაფად მუშაობდა ჟურნალისთვის Vogue Italia და საიუველირო ფირმა Cartier-ისთვის. მოგზაურობით გატაცების თუ სხვადასხვა კულტურებისადმი ინტერესის შედეგად მოამზადა მნიშვნელოვანი რეპორტაჟები ახლო აღმოსავლეთიდან (იორდანია, ირანი, ერაყი და ა.შ.) და ლათინური ამერიკიდან (არგენტინა და ა.შ.). როგორც ფოტოგრაფი, რომელიც ბუნებრივ განათებაზე მუშაობს, ნატალი ტუფენკჯიანი, გულწრფელობით, კეთილგანწყობითა და თანაგრძნობით ასახავს თავისი მოდელების უშუალობას. ის ვილი რონის სიტყვებს — "ლამაზი სურათი გულით მართული გეომეტრიაა" რეალობაში ასხამს ფრთებს.

პროექტის მხარდამჭერია თიბისი და საქართველოს ფრანგული ინსტიტუტი (Institute Frances). გამოფენა გაგრძელდება 4 აგვისტომდე.თ