ავტორიტეტულმა ფინანსურმა გამოცემამ Euromoney გალტ & თაგარტი საქართველოში 2022 წლის საუკეთესო საინვესტიციო ბანკად დაასახელა.

Euromoney Awards for Excellence ჯილდოს მოსაპოვებლად ბანკები მთელი მსოფლიოს მასშტაბით იღებდნენ მონაწილეობას, გამარჯვებულებს შორის კი ისეთი მსხვილი ორგანიზაციები არიან, როგორებიცაა: Bank of America, Goldman Sachs, Citi და სხვ.

გადაწყვეტილების მისაღებად, Euromoney-ს რედაქტორებმა, ექსპერტებმა და ანალიტიკოსებმა ბაზრის კვლევა ჩაატარეს, რათა ის ფინანსური ინსტიტუტები შეერჩიათ, რომლებიც საიმედოდ უზრუნველყოფენ საუკეთესო სერვისების მიწოდებას ადგილობრივ ბაზრებსა და რეგიონებში.

"მოხარული ვართ, რომ Euromoney-მ გალტ & თაგარტი საქართველოში საუკეთესო საინვესტიციო ბანკად დაასახელა. აღნიშნული ჯილდო მთელი გუნდის დაუღალავი შრომის შედეგია. Euromoney-მ ეს აღიარება გალტ & თაგარტს გასული წლის ფარგლებში დანერგილი სიახლეებისა და განხორციელებული პროექტების საფუძველზე მიანიჭა. მათ შორის, ისეთი ინიციატივების, როგორიცაა: კაპიტალის ბაზრის მხარდაჭერის პროგრამა, რომელსაც EBRD-სთან და EU-სთან ერთად ვახორციელებთ; ყველაზე მსხვილი M&A გარიგება უძრავი ქონების სექტორში; ადგილობრივ ბაზარზე კორპორაციული ობლიგაციების 60%-ზე მეტის განთავსება; საერთაშორისო ფინანსური ტექნოლოგიების პლატფორმა DriveWealth-თან პარტნიორობით ინვესტირების სრულიად ახალი გამოცდილების შექმნა, რომლის ფარგლებშიც საქართველოს 10 000-ზე მეტი ახალი ინვესტორი შეემატა — მათ უკვე მობილბანკიდან, სწრაფად და კომფორტულად შეუძლიათ ისეთი ცნობილი კომპანიების აქციონერები გახდნენ, როგორებიცაა: Apple, Microsoft, Google, Tesla და ა.შ. მადლობა გუნდის თითოეულ წევრს და თითოეულ მომხმარებელს, იმისთვის რომ ქმნიან საქართველოში საუკეთესო საინვესტიციო ბანკს. ჩვენ გვეამაყება ეს წარმატება და აქტიურად ვაგრძელებთ მომხმარებლისთვის კიდევ უფრო მეტი ახალი და ინოვაციური შესაძლებლობების შექმნას", — განაცხადა ოთარ შარიქაძემ, გალტ & თაგარტი-ს მმართველმა დირექტორმა.

რაც შეეხება ჯილდოს, Euromoney Awards for Excellence 1992 წელს დაარსდა და გლობალურ საბანკო ინდუსტრიაში პირველი ჯილდოა. წელს Euromoney-მ, 50-ზე მეტი რეგიონული და 100 ქვეყნის მასშტაბით საუკეთესო ბანკის ჯილდოს კატეგორიაში, ბანკებისგან რეკორდული რაოდენობის აპლიკაციები მიიღო.