პრეზიდენტმა სალომე ზურაბიშვილმა პირველი არხის ეთერში იმ წერილზე ისაუბრა, რომელიც პრემიერმინისტრმა ურსულა ფონ დერ ლაიენს მისწერა.

რატომ არის მნიშვნელოვანი: ირაკლი ღარიბაშვილი წერილით ლაიენს არწმუნებს, რომ ყოფილი პრემიერმინისტრი ოლიგარქი არ არის.

  • მისი თქმით, ოპონენტებს არასოდეს წარმოუდგენიათ პოლიტიკაში თუ მართლმსაჯულებაში ბიძინა ივანიშვილის ჩარევის არცერთი ფაქტი.
  • ღარიბაშვილი იმეორებს, რომ არაფორმალური მმართველობის შესახებ განცხადებები პირადად მისთვის განსაკუთრებით შეურაცხმყოფელია, ხოლო ამაზე საუბარი შეურაცხმყოფელია ქვეყნისთვის.
  • პრემიერმინისტრი ამბობს იმასაც, რომ ევროპარლამენტის რეზოლუციის "უარყოფითი გავლენის" სრულად გასანეიტრალებლად, მნიშვნელოვანია, ევროპულმა კომისიამ მკაფიო პოზიცია გამოხატოს "უსაფუძვლო ბრალდებების მიმართ".
  • პრემიერი ირწმუნება, რომ ევროპული კომისიის პოზიციის სიცხადე მნიშვნელოვანია, რათა "არ დარჩეს სივრცე სპეკულაციებისთვის".

ზურაბიშვილის შეფასებით, ეს წერილი ნიშნავს, რომ ინსტიტუტების არაფერი გვესმის.

  • "არ მინახავს, რომ პრემიერი წერდეს კომისიის თავმჯდომარეს იმისთვის, რომ გაემიჯნოს ევროპარლამენტს".
  • პრეზიდენტის განცახდებით, ეს ორი სხვადასხვა ინსტიტუტია, რომლებიც ერთმანეთს პატივს სცემენ და კომისია არ მისცემს შენიშვნებს და არ გაემიჯნება ევროპარლამენტს.
  • "გამიჯნულია ისედაც, იმიტომ რომ სხვა ტერმინოლოგია იხმარა ევროპულმა საბჭომ და არ გადმოიტანა ის ტერმინები, რაც იყო ევროპარლამენტის რეზოლუციაში".
  • "ჩვენ ვართ მსოფლიოში ერთადერთი ქვეყანა, რომელიც ამ ტონით ეკამათება ხან ევროპარლამენტს, ხან აშშ-ის ელჩს".

პრეზიდენტმა თქვა ისიც, რომ როდესაც ღარიბაშვილმა წერილი გაუგზავნა ევროკომისიის პრეზიდენტს ის ბაქოში იმყოფებოდა და შეეძლოთ საქართველოში მოეწვიათ.

ყოფილი პრემიერმინისტრის, გიორგი გახარიას შეფასებით, ღარბაშვილის წერილი დასტურია იმისა, რომ სახელმწიფო პერსონალურ ინტერესს ემსახურება.

ქართული ოცნების თავმჯდომარემ კი თქვა, რომ საჭიროა სახელმწიფო მმართველობის სისტემის პრესტიჟის დაცვა.