"ყველგან შეთქმულების თეორიას ეძებთ. არ ვიცი, თქვენ თუ კონკრეტული არასამთავრობოები. არანაირ გარიგებაზე საუბარი არ არის. ის, რომ ხელისუფლების სხვადასხვა შტო დიალოგს მართავს და გარკვეულწილად აჯერებს სხვადასხვა პოზიციას, არის ძალიან ნორმალური, დემოკრატიული პროცესი" - ასე პასუხობს უმრავლესობის წევრი, მანანა კობახიძე ოპოზიციის ეჭვებს იმასთან დაკავშირებით, რომ საკონსტიტუციო სასამართლოს შესახებ კანონზე პრეზიდენტის ვეტოს წინ, უმრავლესობის, პრემიერისა და მარგველაშვილის გარიგება უძღოდა:

"საბოლოო ჯამში, როგორი შენიშვნები წარადგინა პრეზიდენტმა, რა თქმა უნდა, ეს სწორედ მისი გადასაწყვეტია. ეს არის მისი უფლებამოსილება. შესაბამისად, ჩვენ ვიმსჯელებთ იმაზე, რაც არის წარმოდგენილი".

პრეზიდენტის ვეტოზე მსჯელობა ადამიანის უფლებათა დაცვის კომიტეტზე დღეს, 1 ივნისს, 17 საათზე დაიწყება, რომელსაც პრეზიდენტის ადმინისტრაციის წარმომადგენლობაც დაესწრება.

საკონსტიტუციო სასამართლოს შესახებ კანონში ცვლილებები პარლამენტმა 14 მაისს მიიღო. შემდეგ ის პრეზიდენტს, პრეზიდენტმა კი დასკვნისთვის ვენეციის კომისიას გადაუგზავნა. ვენეციის კომისიის კრიტიკული დასკვნის მიღების შემდეგ გუშინ, 31 მაისს, გიორგი მარგველაშვილმა აღნიშნულ კანონს ვეტო დაადო.

ცნობილია, რომ მარგველაშვილის ვეტოს წინ უძღოდა კონსულტაციები, რომელშიც თავად პრეზიდენტი, პრემიერმინისტრი და საპარლამენტო უმრავლესობა იღებდა მონაწილეობას