მათი განცხადებით, დაუყოვნებლივ უნდა აღმოიფხვრას ყველა სფეროში ის ხარვეზები, რომლებიც ხელს უშლის ევროინტეგრაციას. აღნიშნეს, რომ დიდი დარტყმა მიადგა კულტურული მემკვიდრეობის დაცვისა და ზრუნვის ევროპულ სტანდარტს. ასევე, შეფერხებული სამუზეუმო, სამეცნიერო თუ სხვა საერთაშორისო პროექტები ხელს უშლის ინტეგრაციას ევროპულ სამეცნიერო ინსტიტუციებთან.

რატომ არის მნიშვნელოვანი: ასოცირებული ტრიოს ქვეყნებს შორის, საქართველო ერთადერთია, რომელმაც ევროკავშირის კანდიდატის წევრობის სტატუსზე ევროკომისიისგან რეკომენდაცია ვერ მიიღო.

• კომისიამ ქვეყნისთვის მხოლოდ ევროპული პერსპექტივის მინიჭების რეკომენდაცია გასცა და ის მოთხოვნები ჩამოთვალა, რომელიც კანდიდატობის მიღებამდე უნდა შესრულდეს.
• არსებობს მოლოდინი, რომ 24 ივნისს საბოლოო გადაწყვეტილებაზე ევროპარლამენტის რეზოლუცია და ევროკომისიის რეკომენდაცია აისახება.

რა თქვეს პრესკონფერენციაზე: ხაზი გაუსვეს, რომ კულტურის სფეროდან ხდება განსხვავებული აზრის რეპრესიული დევნა, ინსტიტუციების დასუსტება და ნგრევა, გაძლიერების ნაცვლად. ასევე, ხელისშემშლელ ფაქტორად დაასახელეს საჯაროობის არქონა, რაც აბრკოლებს მაღალი პროფესიული სტანდარტის დამკვიდრებას.

• "ინსტიტუციური ღიაობა და საჯაროობა მიგვაჩნია ერთ-ერთ მთავარ პრინციპად და ისიც, რომ კარგად გავიაზროთ, რომ დღეს ჩვენი ქვეყანა დგას ისტორიულ გზაგასაყარზე" — ეკა კიკნაძე, ხელოვნების მუზეუმის ყოფილი მმართველი.
• "საზოგადოებამ უნდა აიძულოს ხელისუფლება, რათა, აი, ეს შესაძლებლობა არ დავუკარგოთ მომავალ თაობებს, რომ ჩვენ გავხდეთ ევროპული ცივილიზაციის ნაწილი" — ცირა ელისაშვილი, ხელოვნებათმცოდნე.
• "ევროპამ მოგვცა შესაძლებლობა წლის ბოლომდე. 6 თვეში დაიხურება ევროპის კარი. ხომ არ გგონიათ, რომ ვინმე გაგვიღებს კიდევ ამ კარს?! შეიძლება, მე კი არა, თქვენც ვერ მოესწროთ ამ კარის გაღებას და ეს არის უბედურება. აღარ გაიღება ეს კარი და მაშინ მართლა დავიღუპებით" — გია ბუღაძე, მხატვარი.

რას მოგვიწოდებს ევროკომისია: დასკვნაში წერია, რომ ეკონომიკურ, პოლიტიკურ და საზოგადოებრივ ცხოვრებაში პირადი ინტერესების ჭარბი გავლენების აღმოფხვრით საქართველომ "დეოლიგარქიზაციის" ვალდებულება უნდა აიღოს.

• მათივე განცხადებით, აუცილებელია თავისუფალი, პროფესიონალური, პლურალისტული და დამოუკიდებელი მედიაგარემო ჟურნალისტებისთვის.
• ევროკომისია მოითხოვს, გაძლიერდეს გენდერული თანასწორობა და ბრძოლა ქალთა მიმართ ძალადობის წინააღმდეგ;
• შეფასებაში განხილულია, რომ 2021 წლის ივლისის მოვლენების გათვალისწინებით, საქართველოში LGBTQ+ თემის დასაცავად მეტი უნდა გაკეთდეს;

გარდა ამისა, ევროკომისია ამბობს, რომ საჭიროა ქვეყანაში პოლიტიკური პოლარიზაცია უნდა დასრულდეს და შესრულდეს შარლ მიშელის შეთანხმება, რომელიც ევროკავშირის შუამდგომლობით შედგა.

• ასევე, მიიღონ გადაწყვეტილება, რათა სასამართლოებმა განხილვისას პროაქტიულად გაითვალისწინონ ადამიანის უფლებათა ევროპული სასამართლოს გადაწყვეტილებები;
• ახალი სახალხო დამცველის წარდგენისას უპირატესობა დამოუკიდებელ პირს მიენიჭოს, ხოლო პროცესი გამჭვირვალედ წარიმართოს.
• კომისია საქართველოს პროგრესს 2022 წლის ბოლომდე დააკვირდება.