საქართველოს ფინანსთა სამინისტროს საგამოძიებო სამსახურის პრესსამსახურის ინფორმაციით, უკანონო სამეწარმეო საქმიანობის განხორციელების ბრალდებით, 36 სხვადასხვა ფსიქოტროპული აფთიაქის 18 ხელმძღვანელი პირზე სისხლის სამართლებრივი დევნა დაიწყო.

"ჩატარებული გამოძიებით დადგინდა, რომ დიდი ოდენობით შემოსავლების მიღების მიზნით, საქართველოში მდებარე 36 სააფთიაქო დაწესებულებიდან მოქალაქეებზე, მათ შორის არასრულწლოვან პირებზე, სისტემატურად ხდებოდა ფსიქოტროპული და სპეციალურ კონტროლს დაქვემდებარებული მედიკამენტების რეცეპტის გარეშე რეალიზაცია, რითაც დანაშაულებრივი საქმიანობის განმახორციელებელი პირები ხელს უწყობდნენ ე. წ. „სააფთიაქო ნარკომანიას“ და საფრთხეს უქმნიდნენ ადამიანის სიცოცხლესა და ჯანმრთელობას," - აღნიშნავენ საგამოძიებო უწყებაში.

გამოძიების ინფორმაციით, 36 აფთიაქის მიერ 2014 წლიდან 2016 წლის ჩათვლით (3 წლის განმავლობაში) პერიოდში, ყოველგვარი რეცეპტის გარეშე 14,6 მილიონი ერთეული მედიკამენტი გაიცა და აფთიაქის ხელმძღვანელმა პირებმა 15 მილიონ ლარზე მეტი შემოსავალი მიიღეს.

საქმეზე გამოძიება საქართველოს სისხლის სამართლის კოდექსის 192 მუხლის მეორე ნაწილით მიმდინარეობს. სამეწარმეო საქმიანობა რეგისტრაციის, ნებართვის ან ლიცენზიის გარეშე, ანდა სანებართვო ან სალიცენზიო პირობების დარღვევით, რამაც მნიშვნელოვანი ზიანი გამოიწვია ან რასაც ახლდა დიდი ოდენობით შემოსავლის მიღება ჯგუფურად, არაერთგზის, ან ასეთი დანაშაულისათვის მსჯავრდებულის მიერ ისჯება ჯარიმით ან თავისუფლების აღკვეთით ვადით სამიდან ხუთ წლამდე.