უკრაინელი მოკრივე ვასილი ლომაჩენკო მსუბუქ წონაში მსოფლიოს ჩემპიონის ტიტულის მოსაპოვებლად აღარ იბრძოლებს, რადგან უკრაინაში რჩება და რუსეთთან ბრძოლას აგრძელებს, როგორც ჯარისკაცი.

თებერვლის ბოლოს ლომაჩენკო და სხვა ისეთი უკრაინელი მოკრივეები და ჩემპიონები, როგორებიც არიან: ალექსანდრე უსიკი, ვიტალი და ვლადიმირ კლიჩკო, თავიანთ სამშობლოში რუსების შემოჭრას შეიარაღებულები დახვდნენ.

ფოტო: Adam Hunger

ლომაჩენკო — მსოფლიოს ჩემპიონი, ორგზის ოლიმპიური ოქროს მედალოსანი და მსოფლიოს ერთ-ერთი საუკეთესო მოკრივე — საბერძნეთიდან მშობლიურ ქალაქ ოდესაში ჩაფრინდა და ტერიტორიული თავდაცვის ბატალიონს 28 თებერვალს შეუერთდა, რათა ბრძოლაში ჩართულიყო და ოჯახთან ახლოს ყოფილიყო.

უკრაინელ მოკრივეს უახლოეს მომავალში ფინალური ბრძოლა ავსტრალიელ სპორტსმენთან, ჯორჯ კამბოსოსთან უნდა ჰქონოდა, რომელმაც მოწინააღმდეგის გადაწყვეტილებას პატივი სცა და გაამხნევა კიდეც.

"მე პატივს ვცემ შენს გადაწყვეტილებას და კარგად მესმის შენი. ვლოცულობ შენთვის და შენი ქვეყნისთვის. გთხოვ, თავს გაუფრთხილდი და როგორც კი დევინთან ბრძოლაში გავიმარჯვებ, ჩვენ ამ შეჯიბრს ორ ნამდვილ ჩემპიონს შორის გავმართავთ. ღმერთმა დაგლოცოს", — წერს კამბოსოსი ტვიტერზე.

კიდევ სხვა ცნობილი უკრაინელი სპორტსმენები, ალექსანდრე უსიკი და ძმები კლიჩკოები, კიევის ტერიტორიული თავდაცვის ბატალიონებს შეუერთდნენ და რუსეთს ომის შეჩერების თხოვნით მიმართეს.

უსიკის შემდეგი ბრძოლა, რომელიც ბრიტანელ მძიმეწონიან მოკრივესთან, ენტონ ჯოშუასთან უნდა გამართულიყო, ჩაიშალა, რადგან მან უკრაინაში დარჩენა გადაწყვიტა და უარი თქვა ზაფხულის განმეორებით მატჩზეც სწორედ იმავე მიზეზის გამო.