საავტომობილო გზების დეპარტამენტის ინფორმაციით, დიდთოვლობის გამო როგორც შიდასახელმწიფოებრივი, ისე საერთაშორისო მნიშვნელობის გზის მონაკვეთებზე მოძრაობა შეზღუდულია. კონკრეტულად, შეზღუდვა ეხება ქუთაისი-ბაღდათი-აბასთუმანი-ბენარას საავტომობილო გზის 1-50 კილომეტრის — ქუთაისი-საირმის გზას, სადაც მისაბმელიანი, ნახევრადმისაბმელიანი და 30 ადგილზე მეტი ტევადობის ავტობუსების მოძრაობა აკრძალულია. დანარჩენი სახის ტრანსპორტის მოძრაობა დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ტრანსპორტის მოძრაობა სრულად თავისუფალია.

რაც შეეხება საერთაშორისო მნიშვნელობის გზებს, ამ შემთხვევაში შეზღუდვა მოქმედებს თბილისი–სენაკი–ლესელიძის 39–259 კილომეტრზე — ქსანი-სამტრედიის მონაკვეთზე. ინტენსიური თოვლის გამო აქ მისაბმელიანი და ნახევრადმისაბმელიანი ტრანსპორტის მოძრაობა აკრძალულია. დანარჩენი სახის ავტოტრანსპორტის მოძრაობა დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ტრანსპორტის მოძრაობა აქაც თავისუფალია.