საპატრიარქოში ილია მეორე აშშ-ის ელჩს საქართველოში კელი დეგნანს შეხვდა. საპატრიარქოს მიერ გავრცელებული ინფორმაციის თანახმად, დეგნანმა ილია მეორეს აღსაყდრებიდან 44-ე წლის იუბილე მიულოცა და ხაზი გაუსვა მის როლს ქართველი ერის ცხოვრებაში.

"ბედნიერია ერი, როდესაც ეკლესიას ჰყავს ასეთი ბრძენი მეთაური", — საპატრიარქოს ცნობით თქვა დეგნანმა, თუმცა ამასთან საკითხზე ელჩს განცხადება არ გაუვრცელებია.

მათივე ინფორმაციით, პატრიარქმა აღნიშნა, რომ საქართველოსა და აშშ-ის შორის მეგობრობას უკვე მრავალი წლის ისტორია აქვს და ეს უნდა გაგრძელდეს.

"ამასთან, ელჩს მადლობა გადაუხადა საქართველოს მხარდაჭერისთვის, ასევე ქართული კულტურის ძეგლების აღდგენაში შეტანილი წვლილისთვის. თავის მხრივ, ქალბატონმა კელი დეგნანმა ხაზი გაუსვა იმ ფაქტს, რომ მათთვის დიდი პატივია, წვლილი შეიტანონ ისეთი მნიშვნელოვანი კულტურული ძეგლების გადარჩენაში, როგორებიცაა გელათისა და ჯვრის მონასტრები", — ნათქვამია განცხადებაში.

მათივე თქმით, დეგნანმა თქვა, რომ მომავალ წელ სრულდება 30 წელი საქართველოსა და აშშ-ს შორის დიპლომატიური ურთიერთობის დაწყებიდან და ამასთან დაკავშირებით სხვადასხვა აქტივობის განხორციელებას გეგმავს, მათ შორის, საქართველოს რეგიონებში მოგზაურობას.