ფონდი ელექტრონავტი 2021 წლის 11 დეკემბერს, მეთორმეტე დაჯილდოების ცერემონიალს ელექტრონავტი XII ატარებს. ელექტრონავტი 2007 წელს დაარსდა. მისი მთავარი მიზანი ახალი ქართული მუსიკალური ფორმების აღმოჩენა, მუსიკოსების წახალისება და პოპულარიზაციაა.

ელექტრონავტების ვინაობას ინტერნეტ-გამოკითხვის მონაწილეების გარდა, ექსპერტებისგან დაკომპლექტებული ჟიურიც განსაზღვრავს. ჟიურიმ წელს 9 ნომინაციაში, 200-ზე მეტი არტისტის 2020 წლის სექტემბრიდან 2021 წლის 15 ნოემბრამდე გამოქვეყნებული ნამუშევარი განიხილა.

წლევანდელი დაჯილდოება შემდეგ კატეგორიებს მოიცავს:

  • მუსიკალური ვიდეო / Best Video;
  • ლეიბლი / Best Label;
  • ალბომი / Best Album;
  • დიჯეი / Best DJ;
  • ლაივ სთრიმი / Best Live stream;
  • ტრეკი / Best Track;
  • მედია / Best Media;
  • Z არტისტი / Z Artist;
  • ელექტრონავტი XII / Electronaut XII

წელს, პანდემიიდან გამომდინარე, ფესტივალის ნომინაცია კატეგორიების სიიდან ამოღებულია, ხოლო საუკეთესო ცოცხალი შესრულების ნომინაცია, "ლაივ სთრიმის" ნომინაციით ჩანაცვლდა.

კატეგორიაში, Z (ზი) არტისტი დაჯილდოების მეგობარი, თიბისი Z 25 წლამდე ასაკის მუსიკოსს ფულადი პრიზით, 3 000 ლარით დააჯილდოებს. მთავარი პრიზის მფლობელი საჩუქრებს დაჯილდოების პარტნიორისგან, კომპანია ჰერსი და ლიუმენისგან მიიღებს. დაჯილდოების ცერემონიალის სატელევიზიო ვერსიას, საახალწლო პროგრამის ეთერში ფონდის ახალი მედია მხარდამჭერი, რუსთავი 2 გადასცემს.

წლევანდელი დაჯილდოების კიდევ ერთი პარტნიორია, რადიო უცნობი, ხოლო ძირითადი მხარდამჭერი — თბილისის მერია.

საჯარო ხმის მიცემა 9 დეკემბრამდე electronauts.ge-ზე იქნება შესაძლებელი. ნომინანტების სია პრესკონფერენციაზე 10 დეკემბერს, 13:00 საათზე გახდება ცნობილი. პრესკონფერენცია კინოსტუდია ქართული ფილმის დარბაზში გაიმართება.

არსებული ნომინანტები საჯარო ხმის მიცემისა და ჟიურის გადაწყვეტილების მიხედვით შეირჩა — 40% ონლაინ-გამოკითხვა, 60% ჟიური. გამარჯვებული ნომინანტები კი, გამოვლინდებიან დაჯილდოების ცერემონიალზე, რომელიც 11 დეკემბერს შეზღუდული დასწრების ფორმატში, კვლავ Leno Records-ის მხარდაჭერით, კინოსტუდია ქართული ფილმის დარბაზში ჩატარდება.

საკონცერტო ნაწილში სრულიად ახალი და ნაცნობი კომპოზიციებით წარდგებიან:

  • TAMADA;
  • BAD HABITZ;
  • ELLARGE;
  • MECHANICAL RAINBOW;
  • 4D MONSTER LOBSTERS;
  • TOKE და სხვა.