ცნობილმა იუთუბერმა, სახელად MrBeast ნეტფლიქსის პოპულარული კორეული სერიალი, Squid Game გააცოცხლა. იუთუბერმა კალმარის თამაშის მოწყობის სურვილი ჯერ კიდევ ოქტომბერში გამოთქვა, მოგვიანებით კი საზოგადოებას გადასაღები მოედნიდან ფოტოებიც გაუზიარა.

ფოტო: MrBeast

25 ნოემბერს იუთუბერმა 26-წუთიანი ვიდეო გამოაქვეყნა, რომელშიც სერიალის მსგავსად სხვადასხვა თამაშებში ერთმანეთს 456 ადამიანი დაუპირისპირდა. ვიდეოში მონაწილეების ჩაცმულობა, ინტერიერი და თამაშები სერიალში ნაჩვენებ მოვლენებს თითქმის ზუსტად იმეორებს. სერიალის მსგავსად, ამ შემთხვევაშიც გამარჯვებულისთვის ფულადი ჯილდო $456 ათასს შეადგენდა.

ფოტო: MrBeast

სერიალისგან განსხვავებით, თამაშებში დამარცხებული მონაწილეები სახლში უვნებელი დაბრუნდნენ. აგრეთვე, განსხვავებული იყო ფინალური თამაშიც — კალმარის თამაშის ნაცვლად, ფინალში გასულმა მონაწილეებმა ე.წ. "მუსიკალური სკამები" ითამაშეს — მათ მუსიკის ფონზე სკამების ირგვლივ უნდა ერბინათ და მუსიკის გაჩერებისთანავე სკამზე დაჯდომა მოესწროთ.

ფოტო: MrBeast

ვიდეოსთვის მონაწილეების ოთახი, "შუშის ხიდი" და სხვა სივრცეები სპეციალურად შეიქმნა. პროექტის განხორციელება იუთუბერს დაახლოებით $3,5 მილიონი დაუჯდა.

აღსანიშნავია, რომ ვიდეოს დადებიდან 1 დღის შემდეგ მას 54 მილიონზე მეტი ნახვა და 6 მილიონზე მეტი მოწონება აქვს.

კალმარის თამაში იმ ადამიანებზე მოგვითხრობს, რომლებიც უფულობის გამო სასიკვდილო თამაშში ერთვებიან. სერიალში საბავშვო თამაშები სისხლიან შეჯიბრებადაა ქცეული, თუმცა საპრიზო თანხა მონაწილეებს თამაშის დატოვების ცდუნებას აძლევინებს.

ცოტა ხნის წინ რეჟისორმა სერიალის მეორე სეზონის გამოსვლაც დაადასტურა, თუმცა დამატებითი დეტალები ჯერჯერობით უცნობია.

ამავე თემაზე: