ახალი პოლიტიკური ცენტრის - გირჩის ერთ-ერთი ლიდერი, გოგა ხაჩიძე ფეისბუკში წერს, რომ ნაციონალური მოძრაობიდან გირჩის წევრების გამოყოფამდე მათთან პარტიის წევრები გიგა ბოკერია და გოკა გაბაშვილი მივიდნენ და შესთავაზეს არჩევნების დამთავრებამდე მოეცადათ და პარტიას ერთად გამოყოფოდნენ. ხაჩიძე ასე მისივე თანაპარტიელს, იაგო ხვიჩიას გამოეხმაურა, რომელიც გოკა გაბაშვილის შესახებ წერდა.

ხაჩიძე ამავე კომენტარში წერს, რომ ბოკერია და გაბაშვილი მათ ეუბნებოდნენ: "ჩვენი ხალხი გავიყვანოთ პარლამენტში და მერე გამოვეყოთო."

ხაჩიძის კომენტარს გოკა გაბაშვილი გამოეხმაურა, რომელმაც ყოფილი თანაგუნდელის ნათქვამს საპირველაპრილო ხუმრობა უწოდა.

"მე და გიგა მოვედით, გკითხეთ მართლა გადიხართ და პარტიას აკეთებთ? კიო - თქვენ გვითხარით. მაშინ ლაპარაკი დასრულდაო გიგამ გითხრათ და წამოვედით," - დაწერა გაბაშვილმა და მოგვიანებით დასძინა, რომ მათ არ იცოდნენ ახალი პარტიის შექმნის შესახებ.

"ისე წაბრძანდით, რომ არც თქვით რა იყო თქვენი პოზიცია, არც შეეცადეთ საკუთარი პრინციპების დაცვა და გატანა, თუ ასეთი გაგაჩნდათ, ჩუმად და გაძურწვით და ახლა ასწორეთ ისტორია რეტროსპექტულად," - დაწერა გაბაშვილმა.

დღეს, ხაჩიძის მსგავსად არც გაბაშვილია ნაციონალური მოძრაობის წევრი. ის და ნაციონალური მოძრაობიდან წამოსული რამდენიმე პოლიტიკოსი პარტია ევროპულ საქართველოში მიმდინარე წლის 17 იანვრიდან, საპარლამენტო არჩევნების ჩატარებიდან რამდენიმე თვეში გაერთიანდნენ. ზურაბ ჯაფარიძემ, გოგა ხაჩიძემ, პავლე კუბლაშვილმა და გიორგი მელაძემ კი ნაციონალური მოძრაობა 2015 წლის მაისში დატოვეს. მოგვიანებით, ცნობილი გახდა, რომ ისინი ახალ პარტიას - გირჩს ქმნიდნენ.