ქუთაისის საქალაქო სასამართლომ გირჩი – მეტი თავისუფლების წევრს, იმედა კლდიაშვილს 2 000-ლარიანი ჯარიმა დააკისრა და სხდომის დარბაზიდან გაათავისუფლა. ინფორმაცია On.ge-ს სასამართლოში დაუდასტურეს.

"პოლიციელები კანონის ფარგლებში, როგორც თვითონ ესმით და როგორც თვითონ განმარტავენ კანონს, ისე მოქმედებდნენ. მინდა გითხრათ, რომ ჩემი დაკავებისას ძალა გამოიყენეს იმიტომ, რომ, როგორც თვითონ ამბობენ, ძალის გარეშე იმედას გაჩერება ვერ შევძელითო. ამის შემდეგ არ ყოფილი არანაირი წინააღმდეგობა, ჩემი მხრიდანაც აღარ იყო პროტესტი, რადგან აქცია, რომელიც დაგეგმილი გვქონდა, უკვე ჩაშლილი იყო და აზრი აღარ ჰქონდა რამე წინაარმდეგობას. მანამდე კი, რა თქმა უნდა, გავუწიე წინააღმდეგობა, არ მინდოდა, რომ ჩემი აქცია ჩაშლილიყო", – თქვა კლდიაშვილმა სხდომის შემდეგ.

გუშინ, პირველ ნოემბერს გვიან ღამით ქუთაისში იმედა კლდიაშვილი დააკავეს. მისი თქმით, ის სახელმწიფო უსაფრთხოების სამსახურის შენობასთან იზა ჩირგაძის მიმართ ზეწოლას აპროტესტებდა.

იზა ჩირგაძე ქუთაისის 90-ე საუბნო საარჩევნო კომისიის წევრი იყო. მან გუშინ განაცხადა, რომ ქართული ოცნების წარმომადგენელი მმართველი პარტიის სასარგებლოდ ხმების გაყალბებას აიძულებდა. მისი თქმით, ეს არ გაუკეთებია, რის შემდეგაც მასზე ზეწოლას ახდენდნენ, ის კი ენმ-ს დაუკავშირდა და მომხდარის შესახებ ინფორმაცია მიაწოდა.

ამ განცხადების შემდეგ კი დღეს, 2 ნოემბერს ის აღარავის დაკონტაქტებია. სამართლიანი არჩევნები გამოთქვამს მზადყოფნას, რომ ჩირგაძის უფლებები დაიცვას, თუმცა მათი თქმით, ჩირგაძესთან დაკაშირებას დილიდან ვერ ახერხებენ.