შინაგან საქმეთა სამინისტროს ინფორმაციით, ამირან ჯანაშია სისხლის სამართლის კოდექსის 236-ე მუხლის საფუძველზე დააკავეს. აღნიშნული მუხლი ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას გულისხმობს.

ჯანაშიას დაკავების შესახებ ინფორმაცია რამდენიმე საათის წინ ნაციონალური მოძრაობის ერთ-ერთმა ლიდერმა, ანი წითლიძემ გაავრცელა. წითლიძის ინფორმაციით, ჯანაშიას იარაღი ჩაუდეს.

20 ოქტომბერს, ღამით ხობში ორი ყოფილი ძალოვნის, ლექსო რაფავასა და რუსლან შამახიას საცხოვრებელი სახლები გაჩხრიკეს. რაფავა დააკავეს, შამახიას თქმით კი, წაიღეს მის სახელზე გაფორმებული იარაღი. ენმ აცხადებს, რომ ლექსო რაფავას იარაღი და ხელყუმბარა ჩაუდეს. შსს-ს ცენტრალური კრიმინალური პოლიციის დეპარტამენტის დირექტორმა, მამუკა ჭელიძემ ჟურნალისტების კითხვას მომხდართან დაკავშირებით უპასუხა, რომ სტანდარტული საპოლიციო ღონისძიებები განხორციელდა. სხვა კომენტარს შსს ამ ეტაპზე არ აკეთებს.

ამის შემდეგ ძალოვანი უწყების რამდენიმე თანამშრომელმა პროტესტის ნიშნად თანამდებობა დატოვა.

გაიგე მეტი: