საერთაშორისო არასამთავრობო ორგანიზაცია ქართველ სტუდენტთა მსოფლიო გაერთიანება უცხოეთში სწავლის გაგრძელების მსურველ ახალგაზრდებს 27 სექტემბერს 10:00 საათზე ღონისძიებაზე — "Study Abroad Conference - ყველაფერი სტიპენდიებზე" იწვევს. ღონისძიება ჰიბრიდულ ფორმატში ჩატარდება და მსურველებს როგორც ონლაინ, ასევე ადგილზე, თიბისი კონცეპტში დასწრების საშუალება ექნებათ.

"დღესდღეობით, ინფორმაციის სიმრავლისა და ხელმისაწვდომობის მიუხედავად, საზღვარგარეთ განათლების მიღების შესაძლებლობებში გარკვევა ბევრი სტუდენტისთვის დიდი გამოწვევაა. მოცემული პროექტის მთავარი მიზანია თავი მოუყაროს ამ ინფორმაციას და ორგანიზებულად მიაწოდოს ის მსმენელს", — აცხადებენ ორგანიზაციაში.

მნიშვნელოვანია, რომ ევროპის, აზიის, ამერიკის წამყვან უნივერსიტეტებში სწავლის გაგრძელებისა და სტიპენდიების შესახებ ინფორმაციას, ღონისძიების მონაწილეებს, სხვადასხვა ქვეყნების ელჩები, დიპლომატები და საგანმანათლებლო ფონდები გააცნობენ.

კონფერენცია საქართველოს განათლებისა და მეცნიერების სამინისტროს და თიბისი ბანკის მხარდაჭერით იმართება.

ღონისძიების მსვლელობის დროს, მონაწილეებს პრიზებისა და ვაუჩერების მოგების შესაძლებლობაც ექნებათ.

ღონისძიებაზე დასწრება თავისუფალია. რეგისტრაციისთვის მიჰყევით ბმულს.

ქართველ სტუდენტთა მსოფლიო გაერთიანება (WUGS) პირველი ქართული საერთაშორისო არასამთავრობო ორგანიზაციაა, რომელიც 2013 წელს ბრიუსელში ოფიციალურად დარეგისტრირდა და მას შემდეგ აქტიურად უწყობს ხელს ქართველი სტუდენტების განვითარებასა და მათთვის ახალი შესაძლებლობების შექმნას. უცხოეთში განათლების მსურველთა ცნობიერების ამაღლების კუთხით ორგანიზაციამ არაერთი პროექტი განახორციელა და ბევრ ახალგაზრდას გაუკვალა გზა საზღვარგარეთ განათლების მისაღებად.