ამერიკელი ქალი ვირჯინია ჯუფრე ამბობს, რომ 17 წლის ასაკში დიდ ბრიტანეთში ჩამოიყვანეს, სადაც მასზე დედოფლის შვილმა პრინცმა ენდრიუმ სექსუალურად იძალადა. ჯუფრე ასევე სექსუალურ მოძალადედ ცნობილი ჯეფრი ეპშტეინის მბრალდებელია და აცხადებს, რომ პრინცმა ენდრიუმ მასზე ლონდონსა და ნიუ-იორკში ყოფნისას იძალადა.

ჯუფრემ სარჩელი ნიუ-იორკის სასამართლოში შეიტანა. მისი მიხედვით პრინცმა ენდრიუმ მასზე ლონდონში, ეპშტეინის დამხმარის, გისლეინ მაქსველის სახლში იძალადა, ასევე ამერიკაში — ეპშტეინის მანჰეტენის ბინაში და ვირჯინიის კუნძულზე მდებარე სახლში.

ვირჯინია ჯუფრე, რომელიც წარსულში ვირჯინია რობერტსი იყო, აცხადებს, რომ ის არასრულწლოვანი იყო, როცა სექს-ტრეფიკინგის მსხვერპლი გახდა და პრინცი ენდრიუ მასზე ამ პერიოდში ძალადობდა. ის დასძენს, რომ დიდი ბრიტანეთის სამეფო ოჯახის წევრმა მასზე ძალადობის დროს მისი ასაკი იცოდა. პრინცი ენდრიუ დღემდე ყველა ბრალდებას უარყოფს.

"ამერიკაში არავინ არ დგას კანონზე მაღლა, არც პრეზიდენტი და არც პრინცი. კანონმა ყველა უნდა დაგვიცვას, იმის მიუხედავად, რამდენად დიდი ძალაუფლება აქვს ჩვენს მოწინააღმდეგეს. 20 წლის წინ, პრინცი ენდრიუს ძალაუფლებამ, ქონებამ და კავშირებმა მას საშუალება მისცა დაუსჯელად გამოსულიყო ამ საქმიდან და არავინ დაიცვა ბავშვი, რომელიც ძალადობის მსხვერპლი იყო. ბევრი დრო გავიდა და მას პასუხი უნდა მოვთხოვოთ", — წერია სარჩელში.

ჯუფრეს ბრალდებები პირველად წლების წინ გაჟღერდა, თუმცა აქამდე ენდრიუს წინააღმდეგ სარჩელი არ შეუტანია და ახლა მისი განხილვა ახალი კანონის ფარგლებში გახდა შესაძლებელი, რომელიც იმ ადამიანებს იცავს, რომლებზეც ბავშვობაში იძალადეს.

"ვიცი, რომ ეს რისკის ქვეშ მაყენებს მეც და ჩემს ოჯახსაც, ვიცი, რომ პრინცი ენდრიუ და მისი გუნდის წევრები ომს გამომიცხადებენ, მაგრამ არ შემიძლია იმ ადამიანებს გავუცრუო იმედი, ვისაც გამოუცდია ძალადობა და სიმართლის სჯერა", — განაცხადა ვირჯინიამ.

2019 წელს ბრალდებებს დედოფლის შვილი BBC-ის ეთერით გამოეხმაურა და განაცხადა, რომ მსგავსი რამ "არასდროს მომხდარა" და "ის გოგონას არასდროს შეხვედრია", რის შემდეგაც ვირჯინიამ მასთან ლონდონში გადაღებული ფოტო გამოაქვეყნა. ამის შემდეგ ენდრიუმ განაცხადა, რომ ჯეფრი ეპშტეინთან მეგობრობას ნანობდა. კრიტიკის შემდეგ მან დიდი ბრიტანეთის სამეფო ოჯახის მიერ დაკისრებული ვალდებულებები დატოვა.

ჯეფრი ეპშტეინი ამერიკელი ფინანსისტი და გავლენიანი პირი იყო, რომელსაც რამდენიმეწლიანი ბრალდებების შემდეგ სექსუალური ძალადობის ბრალდებები დაუმტკიცდა. ფედერალური გამოძიების დროს შესაძლებელი გახდა 36 გოგოს იდენტიფიცირება, რომელზეც მან სექსუალურად იძალადა, მათგან რამდენიმე 14 წლის იყო. ეპშტეინი 2019 წელს ციხეში გარდაცვლილი იპოვეს, გამოძიების ცნობით, მან მორიგი სასამართლოს წინ თავი მოიკლა. ამ დროისთვის დაპატიმრებულია მისი პარტნიორი გისლეინ მაქსველიც, რომელსაც ვირჯინია ასევე ადანაშაულებს სექსუალურ ძალადობაში. ის დასძენს, რომ 1999-დან 2002 წლებში ის სექს-ტრეფიკინგის მსხვერპლი იყო და წინააღმდეგობის შემთხვევაში, მას ფიზიკური განადგურებით ემუქრებოდნენ.