სიდნი სვინის ახალმა რეკლამამ სპორტსმენი ქალების დიდი უკმაყოფილება გამოიწვია. ახლახან სიდნი სვინიმ Novig-ის რეკლამაში მიიღო მონაწილეობა. Novig სპორტული ვაჭრობისა და პროგნოზირების ბაზრის უახლესი აპლიკაციაა ფეხბურთის, ბეისბოლის, ჩოგბურთისა და სპორტის სხვა სახეობების მოყვარულთათვის. სპორტსმენების აზრით, აღნიშნული რეკლამა სპორტში ქალების სექსუალიზებას უწყობს ხელს.

სარეკლამო რგოლში ეიფორიას ვარსკვლავი სხვადასხვა სპორტულ ინვენტართან — ფეხბურთისა და კალათბურთის ბურთებთან, ჰოკეის კართან და სხვა აღჭურვილობასთან ერთად შიშველი პოზირებს. სპორტსმენმა ქალებმა ეს რეკლამა სოციალურ ქსელებში გააკრიტიკეს და ქალების მიმართ უპატივცემულობაც უწოდეს.

"სიტყვებით ვერ გადმოვცემ, როგორ მაბრაზებს ამის ყურება. როგორ ვცხოვრობთ ისეთ სამყაროში, რომელშიც ქალის სხეულით ფულის კეთება და ქალთა სპორტის სექსუალიზება ჯერ კიდევ ნორმაა?", — წერს ინსტაგრამზე ცურვაში ოთხგზის ოლიმპიური ჩემპიონი, არიარნე ტიტმუსი.

ბრიტანელმა მორბენალმა, ემი ჰანტმა, BBC-სთვის მიცემულ ინტერვიუში სიდნის პირდაპირ მიმართა (მას შემდეგ, რაც ბუდაპეშტში გამართულ ჩემპიონატზე მეოთხე ადგილი დაიკავა) და განაცხადა "სიდნი, აი, ასე გამოიყურებიან ქალები სპორტში — კუნთები, მძიმე შრომა, ოფლი, სისხლი და ცრემლები".

"მთელი ცხოვრება ისეთ სპორტში გავატარე, რომელშიც სპორტსმენ ქალებს ზედმეტად სექსუალურად წარმოაჩენდნენ, მხოლოდ სხეულად აღიქვამდნენ და გვიწევდა ბრძოლა იმისთვის, რომ ჩვენი ნამდვილი შესაძლებლობები სერიოზულად მიეღოთ", — დაწერა ინსტაგრამზე ამერიკელმა ტანმოვარჯიშემ, გრეისი კრამერმა. მოგვიანებით კრამერმა ინსტაგრამის სთორებში გამოაქვეყნა ვიდეოები, რომლებშიც სპორტსმენი ქალების ვარჯიშია ასახული, წარწერით: "აი, ასე გამოიყურება ქალი სპორტში".

გერმანელმა მორაგბემ, სოფი ფელამ აღნიშნა, რომ სპორტსმენი ქალები გოგოებისთვის საუკეთესო მისაბაძი მაგალითები არიან, რადგან ისინი ახერხებენ, "თავი დააღწიონ" საზოგადოებაში დამკვიდრებულ სილამაზისა და ქალურობის სტანდარტებს. "სწორედ ამიტომაა სიდნი სვინის ეს რეკლამა ასეთი შეურაცხმყოფელი მსოფლიოს ყველა სპორტსმენი ქალისთვის", — დაწერა მან ინსტაგრამზე.

კომპანია Novig-სა და სიდნი სვინის წარმომადგენლებს ჟურნალისტების კითხვებზე ჯერჯერობით ოფიციალური კომენტარი არ გაუკეთებიათ.

ასევე იხილეთ: