ოპოზიციონერი პოლიტიკოსი თეონა ჭალიძე ერთიანობის შესახებ რუსთაველის უწყვეტი პროტესტის მონაწილეების განცხადებას ეხმაურება. ის აცხადებს, რომ "მზადაა თანამშრომლობისთვის ყველასთან, ვინც რეალურად ემსახურება ხალხს და ქვეყანას, ვინც რეალურად იბრძვის საქართველოს ევროპული მომავლისთვის".

"ვგრძნობ პასუხისმგებლობას, გამოვეხმაურო რუსთაველის უწყვეტი პროტესტის მონაწილეების განცხადებას, მოწოდებას ერთიანობის შესახებ. მე, ერთი რიგითი ოპოზიციონერი პოლიტიკოსი, მზად ვარ თანამშრომლობისთვის ყველასთან, ვინც რეალურად ემსახურება ხალხს და ქვეყანას, ვინც რეალურად იბრძვის საქართველოს ევროპული მომავლისთვის.

თუ მართლა გვინდა ცვლილება, დროა, ერთმანეთის დასუსტება შევწყვიტოთ.

უნდა შევძლოთ საზოგადოებას ვაჩვენოთ ერთად დგომა იმ საკითხებზე მაინც, რაც გვაერთიანებს.

ვინც მზად არის ქვეყნის ინტერესებიდან გამომდინარე თანამშრომლობისთვის, ჩემში იპოვის საიმედო და შრომისმოყვარე პარტნიორს.

ყველა საქმეზე ორიენტირებულ ფორმატში მზად ვარ ვიმუშაო თავდაუზოგავად, ისე როგორც აქამდე და უფრო მეტადაც", — აცხადებს თეონა ჭალიძე.

რუსთაველზე უწყვეტი პროტესტის მონაწილეებმა 12 სექტემბერს პოლიტიკურ და სამოქალაქო ორგანიზაციებს მიმართეს და ერთმანეთთან დაპირისპირების შეჩერებისა და საერთო მიზნის გარშემო გაერთიანებისკენ მოუწოდეს.

"ვინაიდან უკვე 640 დღეზე მტია რუსთაველის გამზირზე ამ ქვეყნის ერთგულმა და სამშობლოზე შეყვარებულმა მოქალაქეებმა პირადი ინტერესები, განსხვავებები და ამბიციები გვერდზე გადავდეთ და საერთო მიზნისთვის ერთად ვდგავართ, იმავეს მოვითხოვთ ყველა იმ პოლიტიკური, საზოგადოებრივი და სამოქალაქო გაერთიანებისგან, რომელიც თავს ოპოზიციურ ძალად და ბიძინა ივანიშვილის ხელისუფლების მოწინააღმდეგედ მიიჩნევს. აღარ არის ერთმანეთის ლანძღვის, ურთიერთბრალდებების, პოლიტიკური გემოვნების, განსხვავებებისა თუ გამყოფი ხაზების წამოწევის დრო", — განაცხადა უწყვეტი პროტესტის მონაწილემ და საპროტესტო აქციებზე დაკავებული ზვიად ცეცხლაძის მამამ, ზურა ცეცხლაძემ.