21-ე საუკუნეში ტექნოლოგიები ისე სწრაფად ვითარდება, ფეხის აწყობაც კი ჭირს. საოჯახო ტექნიკაც მუდმივად ახლდება და ადამიანისთვის ბევრად კომფორტული ხდება, თუმცა დარწმუნებული ვართ, თქვენს სახლში ახლაც მოიძებნება ნივთი, სულ მცირე, წინა საუკუნიდან, რომელიც დღევანდელ მოზარდებს, ალბათ, სასაცილოდაც არ ეყოფათ.

ამ სტატიაში საბჭოთა დროის ან კიდევუ უფრო ძველ 7 საოჯახო ნივთს ნახავთ, რომელიც ოჯახში ყველას გვქონდა.

1. ხელის "მიქსერი"

ფოტო: Pinterest

ამ საოჯახო ნივთისთვის მიქსერის დაძახება უხერხულიც კი არის, უფრო სწორი იქნება, სათქვეფს თუ ვუწოდებთ. ალბათ ყველას გახსოვთ, რომ ეს ნივთი ყველა სამზარეულოში მოიძებნებოდა და მისი გამოყენება არცთუ სასიამოვნო იყო. ის, პრაქტიკულად, "2-1-ში" ფუნქციას ასრულებდა, რადგან ბეზეს ამოყვანა და მკლავების გავარჯიშება ერთდროულად შეგვეძლო.

2. ყავის საფქვავი

არც ეს არის სავარჯიშო მოწყობილობა — ყავის საფქვავია, რომელიც საკმაოდ პრაქტიკული ნივთი იყო, თანაც — შესანიშნავ სურნელს აყენებდა. მისი გამოყენება, ძირითადად, ყველას ეზარებოდა, თუმცა აუცილებლად მოიძებნებოდა ოჯახის ერთი წევრი, რომელიც ამ საქმეს ხალისით ასრულებდა.

3. წყლის ელექტრონული გასაცხელებელი

ეს ნივთი ბევრისთვის უფრო 90-იანებთან ასოცირდება და მას წყლის გასაცხელებლად არავინ მოიხსენიებდა, ის ყველასთვის "კიპიწელნიკი" იყო და უმეტესად, ცხელი წყლის ერთადერთი წყარო იყო, თუ, რა თქმა უნდა, შუქი ჩამქრალი არ იყო.

4. პრობლემური ტელევიზორი

ფოტო: Ripituc

ეს რელიკვია თუ თქვენც გახსოვთ, ისიც გემახსოვრებათ, რომ მას გვერდებში წამორტყმა ყველაზე უკეთ შველოდა. თუ სახლში საბჭოთა ტელევიზორი გედგა, უბრალოდ წამოწოლილი ვერაფერს უყურებდი. უნდა ამდგარიყავი, რათა არხიდან არხზე გადაგერთო და ხშირად ცემაც არ დაგეშურებინა — აი, ამ პრინციპს ემორჩილებოდა საბჭოთა ტელევიზორი.

5. ჟანგიანი სასწორი

მსგავსი სასწორის ქონა კარგ მხედველობას მოითხოვდა, რადგან ციფრები ძნელად გარჩევადი იყო. ის დიდ წონაზეც არ იყო გათვლილი, 10-15 კილოგრამიანი ლიმიტი ჰქონდა და მსუბუქი ნივთების აწონვისას შეუცვლელი დამხმარე იყო.

6. უშუქობის უთო

ამ უძველესმა ნივთმა 90-იანებშიც კი არ დაკარგა აქტუალურობა, რადგან უშუქობის პერიოდში ტანსაცმელს სხვანაირად ვერ ვაუთოვებდით. ის თავიდან კარგად უნდა გაგეცხელებინა და პერიოდულად კიდევ არაერთხელ შეგეთბო.

7. საბჭოთა ვენტილატორი

ფოტო: Etsy

ჩვენი სიის ბოლო "ანტიკვარი" საკუთარ თავს ძლივს აგრილებდა, მაგრამ თითქმის ყველა ოჯახში მოიძებნებოდა და ზაფხულის ცხელ დღეებში იმის ილუზიას მაინც გვიქმნიდა, რომ ნიავი გვიბერავდა.

ალტა კომპიუტერული და საოჯახო ტექნიკის ერთ-ერთი უმსხვილესი მაღაზიაა, რომელიც მსოფლიოს წამყვან ბრენდებთან პარტნიორობს და მომხმარებელს ათასობით პროდუქტს სთავაზობს. აქ საოჯახო ტექნიკის ყველაზე დიდი არჩევანი დაგხვდებათ.