ვინ თქვა, რომ დაბადების დღის აღნიშვნა ტორტით მხოლოდ ადამიანებს უხარიათ? თქვენ წინაშეა პანდა, სახელად ანანი (安安), რომელმაც 35 წლის იუბილე ულამაზესი ტორტით აღნიშნა. ანანი ისტორიაში ყველაზე ასაკოვანი გიგანტური მამრი პანდაა, რომელსაც ადამიანის მზრუნველობის ქვეშ უცხოვრია.

ფოტო: Ocean Park Hong Kong

აღსანიშნავია, რომ გიგანტური პანდების სიცოცხლის ხანგრძლივობა საშუალოდ 20 წელია, ადამიანების მზრუნველობის ქვეშ ცხოვრებისას — 30. ადამიანის სტანდარტით რომ დავთვალოთ, ანანი 105 წლისაა.

ანანი ჰონგ-კონგში, Ocean Park-ში ცხოვრობს. იუბილეს აღსანიშნავად და გასაგრილებლად მას გაყინული ტორტი, ხილი და ბამბუკი მიართვეს. ფოტოებით თუ ვიმსჯელებთ, იუბილარი დაბადების დღის წვეულებით ფრიად კმაყოფილია.

ფოტო: Ocean Park Hong Kong

გიგანტური პანდა ანანი, რომლის სახელიც "მშვიდობას" ნიშნავს, ჩინეთში დაიბადა და პარკში 22 წელია, რაც ცხოვრობს. მისი მეწყვილე 2016 წელს 38 წლის ასაკში მოკვდა.

აღსანიშნავია ისიც, რომ ცოტა ხნის წინ გავრცელებული ინფორმაციის მიხედვით, გიგანტური პანდები გადაშენების პირას აღარ არიან. ველურ ბუნებაში ამ ეტაპზე 1 800 პანდა ცხოვრობს.

ამავე თემაზე: