შინაგან საქმეთა სამინისტრომ თბილისი პრაიდისა და სირცხვილიას ოფისის დარბევაზე გამოძიება 187-ე მუხლით დაიწყო, რაც სხვისი ნივთის ან დაზიანებას გულისხმობს. უწყება მოუწოდებს რუსთაველზე შეკრებილ ყველა პირს, დაიცვან წესრიგი, დაემორჩილონ პოლიციელთა კანონიერ მოთხოვნებს და ნებისმიერ თემაზე პროტესტი გამოხატონ კანონის ფარგლებში. როგორც ცნობილია, ამ ეტაპზე არცერთი მოძალადე დაკავებული არ არის.

"დედაქალაქის ქუჩებში საპოლიციო ძალები მობილიზებული რჩებიან და განაგრძობენ საზოგადოებრივი წესრიგის დაცვას. კიდევ ერთხელ მოვუწოდებთ ყველას, დაიცვან კანონის მოთხოვნები. წინააღმდეგ შემთხვევაში, პოლიცია იმოქმედებს საკუთარი მანდატის ფარგლებში და სამართალდარღვევის თითოეული ფაქტი იქნება აღკვეთილი და მკაცრი სამართლებრივი რეაგირება მოჰყვება", — აცხადებს შსს.

ჰომოფობიური და ძალადობრივი ჯგუფის წევრებმა თბილისი პრაიდის ოფისი დაარბიეს. დარბევის დროს ადგილზე თანამშრომლები არ იმყოფებოდნენ. მოძალადეები ოფისში აივნიდან შეიჭრნენ და აივანზე დროშებს აფრიალებდნენ.

ისინი, ასევე, მოძრაობა სირცხვილიას ოფისის შენობაში შევარდნენ. როგორც კადრებში ჩანს ჰომოფობიური და ძალადობრივი ჯგუფის წევრები კიბეებზე არბოდნენ, რა დროსაც TV პირველის ოპერატორს თავს დაესხნენ და პირდაპირი ეთერი გაითიშა. ჟურნალისტის ინფორმაციით, ოპერატორს ფიზიკურად გაუსწორდნენ, ჩამსხვრეულია შუშები და დაზიანებულია შესასვლელი.

TV პირველის ინფორმაციით, დალეწილია კამერა, ჟურნალისტს კი მობილური ტელეფონი წაართვეს და დაუმტვრიეს. მათივე განცხადებით, პოლიცია ძალადობაზე არ რეაგირებდა.

პოლიციამ გამოძიება დაიწყო, ასევე, რუსთაველის გამზირზე ჰომოფობიური და ძალადობრივი ჯგუფების მიერ ჟურანლისტებზე თავდასხმის ფაქტებზე. გამოძიება ძალადობისა და ჟურნალისტურ საქმიანობაში ხელშეშლის მუხლებით მიმდინარეობს.

სხვადასხვა მედიის გავრცელებულ კადრებში ჩანს, რომ პოლიცია ჟურნალისტებს არიდებს მოძალადეებს, თუმცა თავდამსხმელებს არ აკავებს. ამ საკითხთან დაკავშირებით დასმულ კითხვებს უწყებაში არ პასუხობენ და მიგვითითებენ, რომ განცხადებით ვიხელმძღვანელოთ.