საპარლამენტო ოპოზიციის წარმომადგენლის, ხათუნა სამნიძის, განცხადებით, პრემიერის განცხადებამ პირდაპირ წაახალისა და პრაქტიკულად მოუწოდა მოძალადე ძალებს, რომ დაიწყონ დაპირისპირება და თავდასხმა, დაარბიონ ყველა თავისუფალი მოქალაქე. ამის შესახებ მან რუსთაველზე განვითარებული მოვლენებთან დაკავშირებით ოპოზიციის ერთობლივ ბრიფინგზე განაცხადა.

"პრემიერის განცხადებამ პირდაპირ წაახალისა და პრაქტიკულად მოუწოდა მოძალადე ძალებს, რომლებიც შეკრებილნი არიან რუსთაველზე, რომ დაიწყონ დაპირისპირება და თავდასხმა. დიდი ხანია, ხელისუფლებას უნდა, რომ კარვები არ იყოს პარლამენტის წინ და კარგად გამოიყენეს ეს მოძალადე ჯგუფები. დღეს კიდევ ერთხელ დადასტურდა, რომ ეს ხელისუფლება პირდაპირ კავშირშია, ერთობლივად აორგანიზებს პუტინისტურ, პრორუსულ ძალებთან ერთად, რომ ამ ქვეყანაში არ იყოს თავისუფალი მოქალაქისთვის შესაძლებლობა, რომ გამოიყენონ თავისი კონსტიტუციური უფლება. ეს იყო დღეს პრემიერის განცხადება, რომ დაარბიონ ყველა თავისუფალი მოქალაქე", — განაცხადა ხათუნა სამნიძემ.

ოპოზიცია მოუწოდებს შსს-ს, განახორციელოს თავისი ვალდებულება და დაიცვან მოქალაქეების უსაფრთხოება.

ჰომოფობიური და ძალადობრივი კონტრაქციის მონაწილეები ჟურნალისტებს თავს ესხმიან. ისინი ფიზიკურ და სიტყვიერ შეურაცხყოფას აყენებენ მედიის წარმომადგენლებს და უმტვრევენ მათ აპარატურას. არიან დაშავებულები.

• სირცხვილიას ოფისთან TV პირველის ოპერატორს სცემეს და აპარატურა დაუმტვრიეს
• ჰომოფობიური და ძალადობრივი კონტრაქციის მონაწილეები On.ge-ს ჟურნალისტს დაუპირისპირდნენ
• ვიდეო: ძალადობრივი კონტრაქციის მონაწილე ჟურნალისტებს სკუტერით მიზანმიმართულად ეჯახება

როგორც ცნობილია, ამ ეტაპზე არცერთი მოძალადე დაკავებული არ არის. სხვადასხვა მედიის გავრცელებულ კადრებში ჩანს, რომ პოლიცია ჟურნალისტებს არიდებს მოძალადეებს, თუმცა თავდამსხმელებს არ აკავებს. ამ საკითხთან დაკავშირებით დასმულ კითხვებს უწყებაში არ პასუხობენ და მიგვითითებენ, რომ განცხადებით ვიხელმძღვანელოთ. უწყების განცხადებით, მომხდარზე გამოძიება ძალადობისა და ჟურნალისტურ საქმიანობაში ხელშეშლის მუხლებით მიმდინარეობს.

თბილისი პრაიდის კვირეული დღეს, 5 ივლისს ღირსების მარშით დასრულდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.

დღეს ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან არიან შეკრებილები და იმუქრებიან, რომ ღირსების მარშის ჩატარებას არ დაუშვებენ.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიჰყავთ ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.

ამავე თემაზე:

• ფოტორეპორტაჟი: ღირსების ფესტივალი — თბილისი პრაიდის კვირეული გრძელდება
• ანგლიკანური ეკლესია თბილისი პრაიდს მხარდაჭერას უცხადებს
• ვისაც სურს, ხელი შეუშალონ მშვიდობიან მსვლელობას ძალადობით და ზიზღით, არღვევენ კონსტიტუციას — დეგნანი