ღირსების მარშის ერთ-ერთი ორგანიზატორის, თამაზ სოზაშვილის განცხადებით, საქართველოს პრემიერმინისტრმა, ირაკლი ღარიბაშვილმა "კოჭების გაგორების სერია" გააგრძელა. ასე აფასებს ის ღარიბაშვილის დღევანდელ განცხადებებს ღირსების მარშთან დაკავშირებით.

"ძალიან სამწუხაროა, როდესაც პრემიერმინისტრისგან მსგავსი შინაარსის განცხადებას ვისმენთ. იქიდან გამომდინარე, რომ არაერთხელ არაერთმა საერთაშორისო თუ ადგილობრივმა ორგანიზაციამ თქვა, რომ ეს ასე არ არსებობს, დაუშვებელია, უბრალოდ მოსალოდნელი ძალადობის რისკის გამო მშვიდობიან მოქალაქეებს აეკრძალოთ შეკრებისა და მანისფესტაციით სარგებლობის უფლება.

სამწუხაროა, მან გააგრძელა კოჭების გაგორების სერია და კვლავ კიდევ ამ ნარატივს აგრძელებს, რომ საფრთხე არის, ჩვენ ვხედავთ, რომ საფრთხე ნამდვილად არსებობს. მინდა მაყურებელს მივმართო, შეხედონ, ამ ადამიანების განცხადებები, რომ მშვიდობიანად გააპროტესტებდნენ, რამდენად ჯდება მშვიდობიან ფორმებში ის ყოველივე, რაც რუსთაველის გამზირზე მთელმა ქვეყანამ, ალბათ, იხილა", — თქვა მან.

დღეს ღარბიაშვილმა განაცხადა, რომ ღირსების მარშის ჩატარება მიზანშეუწონლად მიაჩნია. ღარიბაშვილის მტკიცებით, "ასეთი ტიპის აქციები და ღონისძიებები" პირიქით, უმცირესობების დისკრიმინაციას უწყობს ხელს. პრემიერმინისტრის აზრით, საქართველოში ლგბტ თემის წევრებს არავითარი საფრთხე არ ექმნებათ და "აბსოლუტურად ნორმალურ" ვითარებაში ცხოვრობენ.

ჰომოფობიური და ძალადობრივი კონტრაქციის მონაწილეებმა რუსთაველზე ოპოზიციის მხარდამჭერების კარვები აყარეს. დაზიანებული კარვები იქვე პარლამენტის წინ ყრია.

თბილისი პრაიდის კვირეული დღეს, 5 ივლისს ღირსების მარშით დასრულდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.

დღეს ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან არიან შეკრებილები და იმუქრებიან, რომ ღირსების მარშის ჩატარებას არ დაუშვებენ.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიჰყავთ ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.

ამავე თემაზე: