სრულიად საქართველოს მუსლიმთა სამმართველოში აცხადებენ, რომ თბილისი პრაიდთან დაკავშირებით მათი განცხადება ტექნიკური ხარვეზის გამო იყო მიუწვდომელი. ტექსტი ვებგვერდზე უკვე იძებნება.

პრაიდთან დაკავშირებით ჰომოფობიური განცხადებები რამდენიმე რელიგიურმა ჯგუფმა გაავრცელა — მუსლიმთა სამმართველომ, თბილისის დიდმა სინაგოგამ და ეზიდთა სასულიერო საბჭო. სამივე მათგანი ღირსების მარშის გამართვას ეწინააღმდეგებოდა. ყოველი განცხადება კი შემდგომში საპატრიარქოს საზოგადოებასთან ურთიერთობის სამსახურის ფეისბუქგვერდზე გაზიარდა.

მუსლიმთა სამმართველოს განცხადება ვებგვერდზე განთავსებიდან მალევე გაქრა. სოლიდარობის თემში აღნიშნავდნენ, რომ განცხადება მათი მიმართვის საფუძველზე წაიშალა. ვებგვერდზე ტექსტის დაბრუნების შემდეგ, სოლიდარობის თემში განმარტეს, რომ მანამდე მისი წაშლის შესახებ უშუალოდ სამუფთოს წარმომადგენელმა, ოქტაი ისაევმა დაუდასტურათ.

"ჩვენ დღეს გავხდით მომსწრე იმისა, თუ როგორ ზღუდავს სახელმწიფო მუსლიმი თემის ავტონომიას და რა გზებით აკონტროლებს მუსლიმთა სამმართველოს რელიგიის საკითხთა სახელმწიფო სააგენტო", — აღნიშნულია სოლიდარობის თემის პასუხში.

თბილისი პრაიდის კვირეული 5 ივლისს ღირსების მარშით დასრულდება. ამ დღეს მობილიზებას აპირებენ ძალადობრივი ჯგუფებიც. გარდა ამისა, მარშის საწინააღმდეგო აქცია დაგეგმა საპატრიარქომაც, სადაც ბავშვების მიყვანასაც აპირებენ..

საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

ამავე თემაზე: