დაავადებთა კონტროლის ცენტრის ინფორმაციი, აცრების დაჯავშნის ელექტრონული პორტალი არდგენილია და ფუნქციონირებს. მათივე თქმით, ამ დროისთვის სინოფარმის ვაქცინით აცრის მსურველთა 14 ათასამდე ჯავშანია.

პირველ ივლისს საქართველოში ჩინური ვაქცინის მილიონი დოზა შემოვიდა. მთავრობაში აცხადებდნენ, რომ ორშაბათიდან, 5 ივლისიდან ქვეყანაში მასობრივი ვაქცინაცია დაიწყებოდა.

Sinopharm-ისა და Sinovac-ის ახალ დოზაზე რეგისტრაცია 3 ივლისს, 12:00 უნდა დაწყებულიყო, თუმცა ვებგვერდი რამდენიმე საათის განმავლობაში გათიშული იყო. პორტალი მოგვიანებით ჩაირთო, თუმცა რეგისტრაცია გარტულებული იყო.

ჯანდაცვის მინისტრის მოადგილემ, თამარ გაბუნიამ გუშინვე განაცხადა, რომ პორტალზე კიბერშეტევა განხორციელდა. მისივე თქმით, ტექნიკური ჯგუფები 24-საათიან რეჟიმში მუშაობენ, თუმცა პრობლემის სრულად გადაჭრა ჯერჯერობით ვერ ხერხდებოდა.

შინაგან საქმეთა სამინისტრომ გამოძიება ორი მუხლით დაიწყო — სისხლის სამართლის კოდექსის 285-ე და 286-ე მუხლებით, რაც კომპიუტერული მონაცემის, ანდა კომპიუტერული სისტემის უკანონოდ გამოყენებასა და ხელყოფას გულისხმობს.