თბილისის მერი, კახა კალაძე წალკის მუნიციპალიტეტის ერთ-ერთ სოფელში TV პირველის გადამღები ჯგუფისთვის პროფესიულ საქმიანობაში ხელის შეშლასა და ფიზიკურ შეურაცხყოფაზე დარწმუნებით ამბობს, რომ დამნაშავე პირი სათანადოდ დაისჯება. მისივე თქმით, ძალადობა, დაპირისპირება, კრიტიკული აზრის მიუღებლობა ხელს უშლის ჯანსაღი საზოგადოების ჩამოყალიბებას და ქვეყნის დემოკრატიულ განვითარებას აფერხებს.

"სამწუხაროა, რომ მიწევს გამოვეხმაურო ისეთ მძიმე ფაქტს, როგორიც არის მედიაზე თავდასხმა და ჟურნალისტების პროფესიულ საქმიანობაში ხელისშეშლა. მედიის თავისუფლება არის ის ღირებულება, რითაც სამართლიანად ამაყობს საქართველო და არავის მივცემთ უფლებას, ამ ღირებულებას საფრთხე შეუქმნას. წალკის მუნიციპალიტეტში მომხდარ შემთხვევაზე გამოძიება დაწყებულია და დარწმუნებული ვარ, დამნაშავე პირი სათანადოდ დაისჯება", — წერს კალაძე Facebook-ზე.

დღეს, 30 ივნისს TV პირველის ჟურნალისტსა და ოპერატორს წალკაში, სოფელ წინწყაროში, გადაღების დროს თავს დაესხნენ და ფიზიკურად გაუსწორდნენ, დამტვრეულია აპარატურა. ჟურნალისტის ინფორმაციით, თავდასხმაში გამგებლის ბიძაც მონაწილეობდა.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 126-ე და 154-ე მუხლებით დაიწყო, რაც ძალადობასა და ჟურნალისტურ საქმიანობაში ხელის შეშლას გულისხმობს.