1 ივლისიდან თბილისის მოსახლეობას თელასის ნაცვლად კომპანია თელმიკო მოემსახურება, თელასის ყველა მომხმარებელი კი ავტომატურად თელმიკოს აბონენტი გახდება.

კომპანიის ინფორმაციით, თელასი რჩება გამტარ კომპანიად, ტექნიკურ საკითხებზე, აბონენტების მიერთებაზე იქნება პასუხისმგებელი, მაგრამ უშუალოდ მომხმარებელთან ურთერთობა გადადის თელმიკოსთან.

"ელექტრომიმწოდებელი კომპანიის ცვლილება განპირობებულია, ენერგო სექტორის მასშტაბური რეფორმით, რომლის ფარგლებშიც, საქართველო, ენერგეტიკული ბაზრის ევროპულ მოდელზე გადადის. აღნიშნული ცვლილება მოსახლეობას არანაირ სირთულეს არ შეუქმნის", — აცხადებენ თელმიკოში.

კომპანიის განცხადებით, მოსახლეობამ უნდა გაითვალისწინოს, რომ ივლისის თვეში მომხმარებელი მიიღებს 2 ქვითარს, რომელთაგან ერთი იქნება 1 ივლისამდე დახარჯული ელექტროენერგიის საფასურის ქვითარი თელასისგან და მეორე 1 ივლისის შემდეგ დახარჯული ელექტროენერგიის საფასურის ქვითარი თელმიკოსგან.

"მომხმარებელმა უნდა მიაქციოს ყურადღება შემდეგ გარემოებას: ივნისის დავალიანება უნდა გადაუხადოს თელასს, ხოლო უკვე ივლისის თვის დავალიანება დაფაროს თელმიკოსთან.მნიშვნელოვანია, რომ ორივე ქვითრის ჯამური თანხა არ გადააჭარბებს ელექტროენერგიის თვიური გადასახადის სტანდარტულ მოცულობას. აღნიშნული სქემა მხოლოდ ივლისის თვეში, ანუ გარდამავალ პერიოდში მოქმედებს. შემდგომში, მომხმარებელისთვის უცვლელად რჩება ქვითრის მიწოდების სისტემა და ელექტროენერგიის საფასურის გადახდის არხებიც.თელასის მომხმარებელთა დეპოზიტები, ავტომატურად გადადის კომპანია თელმიკოში და მომხარებლის სააბონენტო ბარათზე აისახება", — ამბობენ კომპანიაში.

მათივე განცხადებით, ეს პროცესი ელექტროენერგიის ტარიფის ცვლილებას არ გამოიწვევს.

რაც შეეხება რეგიონებს, ამ შემთხვევაში ენერგო პრო ჯორჯიას ნაცვლად, მოსახლეობას ეპ ჯორჯია მოემსახურება. როგორც კომპანიაში On.ge-ს განუმარტეს, ელექტროგადამცემი ქსელი ენერგო პროს მფლობელობაში რჩება, ახალი იპ კი აბონენტებთან მომსახურებას უზრუნველყოფს.