და, აი, სამყაროს დასასრული ისევ დადგა.

Amazon-მა დაადასტურა, რომ პოპულარული სერიალი Good Omens მეორე სეზონით დაბრუნდება. ამ სეზონში ისევ ვიხილავთ მაიკლ შინს ანგელოზი აზირაფიელის როლში და დევიდ ტენანტის მიერ განსახიერებულ დემონ ქროულის. ამასთან, ცნობილი გახდა, რომ პროექტის ერთ-ერთი ხელმძღვანელი ისევ იქნება ისტორიის თანაავტორი, ნილ გეიმანი.

ექვსი სერიისგან შემდგარი მეორე სეზონის გადაღებები 2021 წლის მიწურულს, შოტლანდიაში დაიწყება.

ფოტო: Amazon Prime

Good Omens, რომელიც ტერი პრეჩეტისა და ნილ გეიმანის ცნობილი რომანის ეკრანიზაციაა, თავდაპირველად ერთსეზონიან მინისერიალად იყო ჩაფიქრებული. წიგნის ავტორები მრავალი წლის განმავლობაში ცდილობდნენ რომანის ადაპტაციას კინო ან სატელევიზიო ეკრანისთვის, თუმცა, პროექტზე მუშაობის დაწყება მხოლოდ პრეჩეტის სიკვდილის შემდეგ მოხერხდა. საბოლოოდ, სერიალი მაყურებელმა პირველად 2019 წელს იხილა.

წიგნსა და სერიალის პირველ სეზონში ისტორია ანგელოზი აზირაფიელისა და დემონი ქროულის გარშემო ვითარდება, რომლებიც მრავალსაუკუნოვანი უჩვეულო მეგობრობის შემდეგ აპოკალიფსის თავიდან აცილებას ცდილობენ.

გეიმანის თქმით, ის და პრეჩეტი წიგნის შესაძლო გაგრძელებაზე საუბრობდნენ, სადაც აზირაფიელისა და ქროულის ამბები უფრო უხვად იქნებოდა წარმოდგენილი. ეს იდეები, შესაძლოა, სერიალის მეორე სეზონში განხორციელდეს, რადგან გეიმანმა აღნიშნა, რომ "ხალხს აინტერესებს, რა მოხდა მანამდე და შემდეგ ანგელოზისა და დემონის ისტორიაში".

გეიმანმა ასევე დასძინა, რომ ახალ სერიალში მოქმედება ისევ ლონდონში, აზირაფიელის წიგნის მაღაზიაში დაიწყება, სადაც "მოულოდნელად გამოჩენილ მაცნეს თან განმაცვიფრებელი საიდუმლოება მოაქვს".