დეპუტატმა თამარ კორძაიამ, პარლამენტის წინააღმდეგ საკონსტიტუციო სასამართლო სარჩელზე უარი თქვა. საუბარია პარლამენტის იმ გადაწყვეტილებაზე, რომლის საფუძველზეც დეპუტატებს, მათივე მოთხოვნის მიუხედავად, უფლებამოსილება არ შეუწყვიტეს, რაც კორძაიამ, ზურაბ ჯაფარიძესთან და ელენე ხოშტარიასთან ერთად გაასაჩივრა.

სარჩელზე უარი თამარ კორძაიამ იმ მოტივით ახსნა, რომ "ნება შეიცვალა არშესვლასთან დაკავშირებით".

"უკვე ეს გარემოებები მაიძულებს, არ ვიყო დესტრუქციული, არ ვიყო არაკონსტრუქციული ჩემს კოლეგებთან მიმართებაში და ვფიქრობ, ის პასუხისმგებლობა, რაც ავიღეთ ხელმოწერით, მავალდებულებს, ვიმუშაო პარლამენტში. თუმცა, ვთვლი, საკითხი ძალიან მნიშვნელოვანია მომავალი განვითარების თვალსაზრისითაც და მომავალი პოლიტიკური რყევების თავალსაზრისითაც" — განაცხადა თამარ კორძაიამ.

ის გამოეხმაურა საკონსტიტუციო სასამართლოს მოსამართლის, ევა გოცირიძესაც, რომელიც მიიჩნევს, რომ ამ სარჩელს საკონსტიტუციო სასამართლო საერთოდ არ უნდა იხილავდეს.

"სასამართლომ უნდა განიხილოს იმიტომ, რომ ეს არის გზა, რათა უეთესად შევძლოთ საკითხების განჭვრეტა და დანახვა" — განაცხადა კორძაიამ.

ზურაბ ჯაფარიძემ, თამარ კორძაიამ და ელენე ხოშტარიამ საკონსტიტუციო სასამართლოს 2021 წლის 10 თებერვალს მიმართეს. ისინი პარლამენტის მიერ დეპუტატებისთვის მათი ნების საწინააღმდეგოდ უფლებამოსილების არშეწყვეტას ასაჩივრებენ. საკონსტიტუციო სასამართლომ საქმე არსებით განხილვაში 5 აპრილს მიიღო. განხილვა დღეს, 10 ივნისს, დაიწყო და სხდომა ამ წუთებშიც გრძელდება.