საგამოძიებო სამსახურის ინფორმაციით, სადეზინფექციო საშუალებების ფალსიფიკაციის გამო ორი კომპანიის 2 ხელმძღვანელზე სისხლისსამართლებრივი დევნა დაიწყეს.

როგორც უწყებაში აცხადებენ, ისინი სისტამატურად ამზადებდნენ სხვადასხვა მოცულობის სადეზინფექციო საშალებებს, რომელიც არ შეიცავდა იმ ნივთიერებებს, რაც ეტიკეტზე იყო მითითებული და არ აკმაყოფილებდა NCDC მიერ გაცემული ჰიგიენური დასკვნებით გათვალისწინებულ მოთხოვნებს.

"გამოძიებით დადგინდა, რომ დანაშაულში მხილებული კომპანიების ხელმძღვანელი პირები, მცხეთის მუნიციპალიტეტის სოფელ წილკანში და ქ. თბილისში, სხვადასხვა მისამართებზე მდებარე მაღაზიებში და საამქროებში, უკანონო მატერიალური სარგებლის მიღების მიზნით, სისტემატურად ახდენდნენ სხვადასხვა მოცულობის სადეზინფექციო საშუალებების დამზადებას, დაფასოებასა და რეალიზაციას.

სასამართლო განჩინების საფუძველზე, საწარმოებისა და სარეალიზაციო ობიექტების ჩხრეკისას, ამოღებულ იქნა დიდი ოდენობით სარეალიზაციოდ გამზადებული სადეზინფექციო საშუალებები", — აცხადებენ უწყებაში.

საქმეზე გამოძიება საქართველოს სისხლის სამართლის კოდექსის 197-ე მუხლის პირველი ნაწილით და 1971 მუხლით მიმდინარეობს, რაც ფალსიფიკაციას და ფალსიფიცირებული ნივთის უკანონო გასაღებას გულისხმობს. ამ მუხლებით გათვალისწინებული დანაშაული სასჯელის სახით ითვალისწინებს თავისუფლების აღკვეთას 1-დან 3 წლამდე ვადით.