დაავადებათა კონტროლის ეროვნული ცენტრის დირექტორის მოადგილე, პაატა იმნაძე საქართველოში ეპივითარების გაუარესებას პროგნოზირებს.

"ახალი შემთხვევები აღდგომამდე ქეიფებმა მოიტანა. აღდგომის ქეიფი თავის შედეგს გამოიღებს, დაახლოებით, 10 დღეში", — განაცხადა იმნაძემ გადაცემა თავისუფალ სივრცეში.

მიმდინარე წლის იანვრის შემდეგ საქართველოში Covid-19-ით ინფიცირებულთა რაოდენობამ 2 000-ს პირველად გადააჭარბა.

5 მაისის მონაცემებით, საქართველოში კორონავირუსის 2 171 ახალი შემთხვევა დადასტურდა, გამოჯანმრთელდა 1 074, ხოლო გარდაიცვალა — 24 ადამიანი.

ბოლო 4 თვის განმავლობაში 2 000-ზე მეტი შემთხვევა მხოლოდ იანვარში დაფიქსირდა, ისიც ორჯერ — 5 იანვარს ეს მაჩვენებელი 2 316 იყო, ხოლო 9 იანვარს — 2 058.