ჭყონდიდის ყოფილი მიტროპოლიტი მეუფე პეტრე ცაავა ჭყონდიდის ეპარქიაში განვითარებულ მოვლენებზე პასუხისმგებლობას მეუფე სტეფანეს აკისრებს. როგორც ის მთავარ არხთან აცხადებს, "შენს რეზიდენციაში, როცა შენ ხარ მასპინძელი, ადამიანები 4-5 მეტრის სიმაღლიდან რომ გადაცვივდებიან, მთელი პასუხიმგებლობა შენზეა".

ის, ასევე, ამბობს, რომ არაორგანიზებული შეკრება და კრების ჩატარება ცხადყოფს, რამდენად ქაოსია დღეს ეპარქიაში. ჭყონდიდის ყოფილი მიტროპოლიტის აზრით, მეუფე სტეფანეს მარტვილის ეპარქიაში გამწესება დიდი უსამართლობა იყო.

"ათწლეულებია უკვე ეკლესია იმართება ზნედაცემული ადამიანით, რომელმაც თავისი თავის კერპი შექმნა და წმინდანად გამოაცხადა. ის ახალისებს ძალადობას და არის ძალმომრეობით მმართველი, ცბიერი, უკანონო და უსამართლო. მორიგი უსამართლობა იყო სტეფანეს გამწესება ჭყონდიდის ეპარქიაში...

სჯულის კანონი კატეგორიულად კრძალავს უსაფუძვლოდ, ეპარქიაში წინამღძოლის გადაადგილებასა და ცვლილებას. ეს არის უხეში კანონდარღვევა, როცა მიზეზგარეშე ეპისკოპოსს ცვლი, — ამბობს მეუფე პეტრე ცაავა.

მისივე თქმით, ცოტა ხნის წინ მიაწოდეს ინფორმაცია, რომ ვიდრე სინოდი ჭყონდიდის ეპარქიაში მეუფე სტეფანეს დანიშნავდა, მას თავს, მისსავე მიზეზით დაესხნენ.

"ახლა შემატყობინეს, რომ ის [მეუფე სტეფანე] იყო ფიზიკური ძალადობის მსხვერპლი. ერთ-ერთი ადამიანი თავს დაესხა მას ქვემო სვანეთიდან და მისთვის სამართლიანად ფიზიკური შეურაცხყოფა მიაყენა. იმის ნაცვლად, რომ გამოეძიებინა საპატრიარქოს რა მოხდა, რატო აღმოჩნდა ის დაპირისპირებაში და რას ედავებოდა მას მრევლი, იმის ნაცვლად რომ დაესაჯათ, დააწინაურეს თითქოს და გაამწესეს ეპარქიაში", — აცხადებს მეუფე პეტრე.

ჭყონდიდის ეპარქიაში მეორე სართულის აივანზე მოაჯირის ჩანგრევის შედეგად 10-მდე ადამიანი გადავარდა. არიან დაშავებულები, მათ შორის, ჟურნალისტებიც.

გარდა ამისა, ეპარქიაში ერთ-ერთი სასულიერო პირი მთავარი არხის ჟურნალისტსა და ოპერატორს ფიზიკურად შეეხო.

გავრცელებულ კადრებში ჩანს, რომ ოთახში, რომელიც ბევრი სასულიერო პირი დგას ოპერატორი იღებს და ჟურნალისტი შესვლას ცდილობს. ჟურნალისტს ხელზე ქაჩავენ და შესვლის საშუალებას არ აძლევენ. ამ დროს ერთ-ერთ სასულიერო პირი ოპერატორს ხელს უშლის გადაღებაში და კამერას ხელს კრავს, რის შემდეგაც ჟურნალისტს ხელებში ახტება და მიკროფონს ართმევს.