ქართული ოცნების აღმასრულებელი მდივნის, მამუკა მდინარაძის თქმით, ქართულ საზოგადოებას არ სჯერა TV პირველის მიერ გავრცელებული ჩანაწერების ნამდვილობის.

"არ აღშფოთდა ეს ხალხი იმიტომ, რომ არ იჯერებენ ადამიანები იმას, რაც არ არის დასაჯერებელი. ქართული ოცნების ლიდერების ძალადობას და ამაზე აღშფოთებულ ნაციონალური მოძრაობის ლიდერებს, არ იჯერებს ქართული საზოგადება", — განაცხადა მამუკა მდინარაძემ.

მდინარაძე ამბობს, რომ ეს არის კამპანია, რომელსაც უნდა აღეშფოთებინა საზოგადოება, თუმცა, მისი თქმით, აღშფოთდნენ ისევ ისინი, "ვინც ფაბრიკაცია მოახდინა".

"ჩვენ კვლავ მზად ვართ, გავაგრძელოთ მოლაპარაკებები. მოლაპარაკებას ალტერნატივა არ აქვს, როგორც ამ დღეების განმავლობაში ხშირად ვთქვით. კონკრეტული, პატარა საბაბების მოფიქრება, მესმის, ვნახეთ ის კონკრეტულ პერსონებზე გადავიდნენ. ამისათვის იყო ეს ყველაფერი გაკეთებული, ეს პიარ-კამპანიაც, რომლისთვისაც უნდა აღშფოთებულიყო ქართული საზოგადოება და აღშფოთდნენ ისევ ისინი, ვინც ფაბრიკაცია მოახდინა, ვინც ჩაიწერა თავის დროზე, მერე დაამზადა, დაამონტაჟა და ვინც ეს სიცრუე გამოიგონა", — განაცხადა მდინარაძემ.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.

გაიგეთ მეტი: